Personal asistentlär Gagauziyadan ay parasını regional bücetindän kabledeceklär. Bölä çıkış Bakannık komitetin oturuşunda kabledildi.
Gagauziya Bakannık komiteti kabletti kararı Saalıı korumak bakannıın işçilerin sayısını 115 personal asistentina genişletmää. Büünkü gün Saalıı korumak bakannında 260 kişi çalışȇr, eni yıldan 365 kişi olacek. Nicä nışannadı avtonomiyanın başkanı Evgeniya Guţul, kuvetlär buldular lääzımnı paraları bu insannara. İleri devlet kuvetleri personal asistentlerin kurumunda diişmeklär geçirildilär, devlet bücetindän finanslamak bu kategoriya insanı regional bücetinä geçirildi.
«Elbetki, biz diil bir sıra devledä danıştık. Saalıı korumak bakannıı da danışmakları yazdı, ama cuvap kabletmedik. Sade bir sıra kabledildi cuvap kuvetlerdän, ki şindän sora personal asistentlerin finanslaması bizim bücetä geçiriler. Onuştan biz işçilerin sayısında diişmekleri lääzımdı yapalım, da bu 115 kişiyi kurumun işçilerin sayısına katalım. Yok nasıl onnarı zorlukta brakalım, finans sızıntısını savaştık bulmaa. Yok nasıl insanın sayısından, kim hastaları bakȇr, ayıralım, kim kabledecek bu finans yardımı, kim dä kabletmeyecek»,- nışannadı başkan Evgeniya Guţul.
Saalıı korumak bakanı Edgar Dimov urguladı, ki ileri Konstituţiya daavası alaşmayı bu soruşlan baalı hiç bakmadı.
«Vartanän Konstituţiya daavasına alaşmayı yazdı Kişinöv için, orayı Gagauziyayı da kattı. Ama Konstituţiya daavası bu alaşmayı zapetti, hiç bakmadı, söleyip, ani Restart programası vardı. Nicä bän bilerim, Kişinöv muniţipiyasının primariyası kendi bücetindän personal asistentlerinä öder, hep ölä, nicä dä biz kararladık ileri dooru yapmaa»,-nışannadı Ȇdgar Dimov.
Saalıı hem soţial korumak bakannıın işçilerin sayısını büülmesinnän baalı diişmeklär 2025 yılın çeketmesindän işlemää başlayaceklar.
Avtor: L. Novak, operator: Gr.Stavilov, montaj: İ.Rezuneţ