Moldova devletindä aprelin 1 kuvedä girdilär er kodeksin eni kuralları, angılarına görä erli kuvetlerin olacȇk kolaylıkları kiralık vermää 2 yılına işlenilmedik saabilärlän topraa.
Er kodeksindä belli edili duruma katılmak mehanizmalar, acan çiftçi erlär kullanılmȇrlar, da zäännik götürerlär komuşu topraa, angılarını işleerlär çiftçilär. Eerlim çiftçi erin saabisi kullanmarsa topraa lääzımnı uurda 2 yılın içindä, da er otlandıysaydı,erindeki kuvetlerin var hakı bu topraa kullansın, vereräk onu kiraya.Bunun için haberledi Komrat Halk advokatın ofisin başı Svetlana Mironova: «Bu kanon belli etti er ilişkilerini hem kim var nicä olsun toprak meraların saabisi. Açıkçasına belli topraan klasifikaţiyası da kararlandı, ani çiftçi uurunda toprak yok nicä kullanılsın yabancı vatandaşlan, firmaylan ya da üridik kişilärlän sınır aşırı kapitallan. Çiftçi uurunda topraa var kolay kullansın sade kişi, angısının var Moldova devletin vatandaşlıı, yada o Moldovanın rezidenti,angısının firması gecti registrasiyayı Moldova devletindä».
Hepsi çiftçi uurunda topraklar lääzım herzaman işlenilsinnär. Eerliim annaşılarsaydı, ani er otlandı da işlenilmeer iki yılın içindä, erli kuvetlär yollaceklar topraan saabisinä kiyat, neredä haberleceklär, ani o üç ayın içindä lääzım başlasın topraa kullanmaa, urguladı Svetlana Mironova: «Erli kuvetlär hükümetin hem er kodeksin kararına görä lääzım en ilkin topraan saabisinä danışsınnar, sora da onnarın var kolayı ondan alsınnar bu topraa. Da ozaman erindeki kuvetlär kendileri ananaşmakları kiralık için kurȇrlar. Hepsi paralar, angıları kiralıktan kabledileceklär maasuz sçötta toplu olaceklar. Topraan saabisinin var hakı çevirsin kullanmaya topraa, haberleyeräk erli kuvetleri bu iş için».
Topraan hepsi saabileri lääzım iicesinä kullansınnar toprakları, söleniler kanonda. Eerliim bir da olay yapılmarsasydı topraan korumasında, otların yok etmesindä, ozaman er saabilerini cuvaplaa çaaraceklar, urguladı Komrat halk advokadın ofisin başı Svetlana Mironova.
Moldovanın hem Gagauziyanın en mekalı haberleri GRTnın Telegram kanalında!