Oktäbrinin 15 – dä küülerdä yaşayan karıların halklararası günü nışannanȇr. O doorudulu getirmää cümnenin aklısına, nekadar paalı karıların çalışmaları. Bizim süjetımızın kahramanı Beşgöz küüyün yaşayanı, Gagauziya Şannı kultura zaametçisi Aleksandra Molla.
Beşgöz küüyün yaşayanı, Gagauziya Şannı kultura zaametçisi Aleksandra İvanovna Molla nışannadı, ani küülerdä yaşayan karılarda var bir pek islä tabet – çalışmaa, onnar pek çok işleerlär.
«Bän sayȇrım, ani taa ilerdän biz duymadık zorluu, söleerim nçin. Biz adamnan işleri pay etmedik, birerdä işledik, evdä işleri barabar yaptık, imää yaptık birerdä, giisi yıkadık birerdä, iştän geldik, kazdık baamızı, kartofimizi ektik, topladık suvannarı birerdä. O üzerä bän sayȇrım, ani bän kısmetli bir kadınım, ani o bana yardım etti, bän dä ona yardım ettim. Hiç bir zaman da düşünmedik, ani biz brakalım küüyümüzü, aylemizi, evimizi brakalım, da nereyi sä gidelim, da aarayalım iilin yaşamak — o diil dooru»,-dedi Aleksandra.
Küülerdä yaşayan karılar kurȇrlar dünnenin 4 – cu payını.Onnar oynȇȇrlar en önemli rolü küü ilerlemesindä. Ondan kaarä, onnar büüderlär uşak, bakȇrlar büük yaşta hem hasta insannarı.
«Bän sayȇrım, ani karılar küüdä taa kaavi, diil ani onnar çok iş bilerlär, amma onnar başka türlü düşünerlär, onnar uşaklarına başka türlü nasaat vererlär. Bizim karılarımız pek akıllı, esaplı karılar. Onnar kendi analarını baktılar , örnek uşaklarına gösterdilär, onnarın da uşakları onnarı dört duvarın içindä brakmayaceklar»,- nışannadı Molla.
Geçirmää deyni bütün dünnedä küülerdä dä yaşayan karıların gününü ideya çekiler OON karıların 4 – cü konferenţiyasından, angısı geçirildi 1995 – ci yılında Pekinda.
«İlkin — isteerim kutlmaa hepsi karıları Moldova devletindän, Gagauziyadan. Ko Alla versin saburluk, saalık, dayanmak»,- ekledi Beşgöz küüyün yaşayanı, Gagauziya Şannı kultura zaametçisi Aleksandra Molla.
Bütünnä dünnedä küülerdä yaşayan karıların gününü geçirilmesi bakıldı, nicä cümnenin tutturması küülerdä yaşayan karıların çoktaraflı rolünü.
Avtor: P. Barbova, operator: V. Kıssa, montaj: A. Gerçu