Her yıl, açan yısıtmak sezonu çekeder, Gagauziya Hatalı olayları bakannıın izmetçileri geçirerlär haberlemäk kampaniyasını, ki azaltmaa ateş tutuşmakların sayısını hem türlü hatalı olayları, yakarkan sobaları hem başka sıcak verici tertipleri kullanarkan.
Gagauziya Hatalı olayları bakannıın izmetçileri Kongazçik küüyündä bulundular, neetlän haberlemää insanı, nasıl kendi yaşamaklarını korumaa, sobaları yakarkan hem elektrik tertiplerini kullanarkan.
«Biz vereriz naasat insannara baksınnar, nicä işleer onnarın sobaları, yısıtmak sistemaları, gaz hem ȇlektik tertipleri.Lääzım olarsaydı, baktırtsınnar onnarı uzmannarda, soba urmasın başlarına hem karbon dioksid gazlarınnan zihirlenmesinnär, hatalı olaylar razgelmesinär.Vereriz nasaatları yangına karşı kuralları tamannasınnar, hem daadȇrız broşüraları, ki onnarın olsun kolaylıkları okumaa onnarı hem kuralları esaba alsınnar»,- dedi Ruslan Mazurenko, Gagauziya Hatalı olayları bakannıın ofiţeri.
Kurtarıcılar girerlär insannarın evlerinä , bakȇrlar, ne halda onnarın sıcak verici tertipleri bulunȇrlar, türlü nasaatları vererlär, ki ev çorbacıları bozuk olan sobaları, kotölları,kaminnarı düzsünnär, da butakım hatalı olaylardan korunsunnar.
«Yaklaşȇr kış. Da biz haberleriz insannarı, nicä korunmaa, sobaları kullanarkan. Te, alınız broşurayı. Burada var insrukţiyalar, nasıl yısıtmak sezonunda hatalı olaylardan korunmaa. Bakınız sobanızı, orada çatlaklar olmasınnar , yanar koorlar erä düşmesinnär, da ateş tutuşmasın, açıkgöz olunuz»,- nışannadı Nikolay Nikoglo, Gagauziya Hatalı olayları bakannıın ofiţeri.
«Bizä büün geldilär kurtarıcılar, annattılar, nicä dooru sobayı kullanmaa, kötü işlär evimizdä olmasınnar»,- söledi Kongazçik küüyün yaşayanı.
Çoyu insannar kotölları kullanȇrlar, angılarını yakacaklan yada kömürlän yakȇrlar. Bu sıcak verici tertipleri da lääzım büük dikkatlıklan kullanmaa, nışannadı Nikolay Nikologlo Gagauziya Hatalı olayları bakannıın ofiţeri.Açan soba urȇr insannarın başlarına, koku duyulmȇȇr.Sade insana prost başlȇȇr gelmää, urguladı Ruslan Mazurenko.
«Еer siz kuvetsiz kaldıysanız, başınız dönärsäydi, yada kusacanız kalkarsaydı- bu gösterer onu, ani sizin başlarınıza soba urdu. Lääzım, nekadar taa tez, içerdän çıkmaa, birkimseyini yardıma çaarmaa, hem 112 izmetinä telefon açmaa.Bekläyiniz hızlı medik yardımını, poliţiya uzmannarını yada kurtarıcıları, ki onnar sizä yardım etsinnär»,- ekledi uzman.
Statistika haberlerinä göra Moldovada 2024 yılın çeketmesindän beeri büünkü günädän 1242 ateş tutuşması oldu, bozuk sobaları kullannarkan, bu beterä 18 kişi geçindi.
