Büük ayın 28 -dä Kişinöv kasabasında düzmäk işlerindän sora Mihail Çakir adına bibliotekasının ofiţial açılışı geçti. Yapının önündä Ay Bobaya hem Aydınnadıcıya Mihail Çakira büst koyuldu. Yortulu toplantıda bulundu bizim televizion grupamız.
Düzmäk işerindän sora enidän kendi kapularını açtı Mihail Çakir adına bibliotekası, Haşdey adına Kişinöv kasabasının bibliotekasının filialı. Düzmäk işleri oldular Türkiye Devletin “TİKA” Agentstvosunun yardımınnan.
«TİKA» Agentstvosu viţe — prezidenti Mahmut Çevi̇k çizgiledi, ani bitki yıllar çok finans koyulȇr kultur proektlerinä, neçinki maasuz kulturanın yardımınnan var nasıl dünneyi korumaa.
«Halklar hem onnarın kulturaları yaşȇrlar, ilerletmää deyni kyulturaları hem da halkarın istoriyalarını , biz lääzım üürenelim milletlerin dillerini, koruyalım hem ilerledelim milletleri — pek önemni korumaa dilleri, angılarında onnar lafederlär»,- Mahmut Çevi̇k çizgiledi.
Kişinöv kasabasının primarı İon Çeban çizgiledi biblioteka işin önemniini kulturanın ilerlemesindä.
«Biz büün bulunȇrız lääzımnı eni erin açılmasında uşaklar için, gençlär için, hepsi insannar için, kim meraklanȇr okumaklarlan, te onnar için, kim meraklanȇr debatlarlan hem diskusiyalarlan»,- İon Çeban çizgiledi.
Mihail Çakır adına bibliotekası herzaman geçirer literatura okumaklarını hem başka toplantıları, angıları gagauz literaturasını, istoriyasını, kulturasını hem adetleri ilerlederlär, çizgiledi Kişinöv kasabasında Mihail Çakir adına bibliotekasının öndercisi Anjela Vi̇nti̇lȇ: «Bu iş oldu hepsinin istemeklerinä görä, insannarın kimisi şaşardılar, ani burada durmȇȇr Mihail Çakirin büstu. Bu biblioteka halezdän Moldova devletindä sayılȇr gagauz literaturasının ilk bibliotekası».
Mihail Çakir adına bibliotekasınnın düzmäk işlerindän sora açılışında bulundu Mihail Çakirin unukanın unukası Vi̇ktor Çaki̇r: «Mihail Çakir pek anılmıştı kendi vakıdında, büük aydınnadıcıydı. O çevirdi Bibliyayı kendi ana dilinä, hep o vakıt ona uydu kurmaa gagauz alfavitini, taa da ileri kendi halkını aydınatmaa. Da hepsi bunnar pek önemni herbir halk için, olsun deyni kendi dilleri hem alfaviti».
Mihail Çakir, angısının adını taşıyȇr biblioteka, sayılȇr gagauz- rumın sözlüün ilk avtoru, angısı tiparlandı 1938 — ci yılda. İstorik Stepan Bulgar çizgiledi, ani Mihail Çakir sayılȇr halkın simvolu.
«Bu bir pek nışannı gün, o lääzım olsun kalendardä bir açık sayfa gibi, neçinki bu bizim kulturamızın tanıtması. Yoksaydı annaşmak, duygular, ani biz ilerleeriz, ozaman durgunȇrsın. Bu söleer onu, ani biz erimizdä durmȇȇrız, ama ilerleeriz»,- İon Çeban çizgiledi.
MD Gagauzların toplumun öndercisi Ni̇kolay Terzi̇ nışannadı proektin önemniini.
«Mihail Çakir — o ilk, kim 1904 — cu yılda yazdı Peterburga kiyat versinnär deyni izin geçirmää duvaları moldovan dilindä. Biraz taa sora, 1907 -ci yılda danıştı versinnär izini gagauz dilindä dä geçirmää. Burada, Kişinövda, o kurdu başlankı okulu, neredä üürendilär gelennär»,- Terzi̇ nışannadı .
«TİKA» Agentstvosu viţe — prezidenti Mahmut Çevi̇k baaşış gibi verdi Mihail Çakir adına bibliotekasına 2 komplekt sözlük: ontomnuk sözlüü hem da akademiin Todur Zanetin altıtomnuk sözlüünü, angısı diil çoktan tiparlandı. Sözlüklär çıktılar dünneyä «TİKA» agentstvosunun hem Türkiye Kultura Ministerliin yardımnarınnan.
«İsteerim çok saa ol sölemää Türkiyenın «TİKA» agentstvosuna finans yardımı için tiparlamaa deyni büük gagauz — rumın sözlüünü. Çok saa olunuz, ani inandınız bana. Bu altıtomnuk sözlüünä girer 56 bin laf. O verilecek gagauz halkına, Moldova devletin bibliotekalarına hem da bütünnä türk halkına»,- Todur Zanet nışannadı.
Mihail Çakir adına bibliotekası kuruldu 1992 — ci yılda, neetlän ilerletmää Moldova devletin türlü milletlerin kulturalarını.
