Komratta S.Kurogloyu andılar. Tombarlak masa geçti onun adını taşıyan gimnaziyada. S.Kuroglo — istorik, ȇtnograf, gagauz dili aaraştırıcısı, yazıcı hem peetçi. Onun paalı yaptıkları için annattılar bilim adamnarı hem onnar, kim onu kendisini bilärdilär. Tombarlak masayı birliktä hazırladılar hem geçirdilär S.Kuroglo adına gimnaziyası hem Gagauziya M.Maruneviç adına Bilim-araştırmak merkezi.
Tombarlak masanın süresindä üürenicilär Kuroglonun şiirlerini okudular. Kalan katılannar, kimä ecel S.Kurogloyu bilmää kısmeti baaşladı, onunnan işlemää, dost olmaa kolaylıı verdi, bu adam için annattılar. Gagauz peetçisi P.Çebotar annattı, ani S.Kurogloylan taa 1973-cüdä, 8-ci klasta üürenärkän tanıştı. Yıllar geçtikçä Stepan Stepanoviçlän çok vakıt birliktä geçirdi, literatura için lafetti, folklor zenginniini açıkladı, ȇkspediţiyalar için marşrut kurdu.
«Stepan Stepanoviç herzaman tutardı cöbündä kartaları. İşitti bir laf, bir şaka, deyärdi «ya sölä taa bir keret» çıkarȇr yazȇȇr»,- gagauz peetçisi P.Çebotar annattı.
P.Çebotar büün dä Stepan Stepanoviçin yazılarını aaraştırȇr. O büük hatırlan koruyȇr onun bloknotunu, angısında ilk yazıları S.Kuroglo taa 1973-cü yılda yazmıştı. P.Çebotar okudu bu bloknotta olan peetlerin birisini.
«Bän — bir tenäyim.
Karannaa, suuk topraa beni attılar.
Toprak — yorgan bana.
Bän — bir tenäyim.
Zın topraa düştüm
Sayȇrım gecelerimi».
«O kendisini yaraştırȇr bir tenäylän. Ölä dä var. Açan teneyi topraa atȇrsın, o büüyer. Da sora olȇr gözäl, zengin bereket»,- söledi peetçisi.
S.Kuroglo için, nicä bir becerikli üüredici için, onun studenti, büünkü gündä aaraştırıcı, ȇtnograf, filologiya bilgileri doktoru Vitaliy Sırf söledi: «Cümbüş bizä annadırdı. O şakacı bir adamdı. O becerärdi zor işleri kolay annatmaa. Biz kolay annardık, ne iş için gider söz».
S.Kuroglo sade bir bilimci diildi, o akına adınnadıcıydı. O gagauzların kimliini aaraştıran, halkının kulturasına, ana dilinä önem verän bir adam. Hatırlan onu anȇrılar hem Moldova gagauzları hem dä Ukraina gagauzları, halız onun ana küüyündä — Dimitrovkada.
«O bizä deyni pek önemni bir adam. O kendi yaşamasını gagauz halkına baaşladı. Bizim küüyümüz onu pek sayȇr. Onun hatırınnan biz çıktık gagauzların arasına. Biz gagauz halkın bir payı, sade Ukrainada bulunȇrız»,- Dimitrovka küüyü yaşayanı, KDU studenti Kristina Stançeva sayȇr.
Büünkü gündä S.Kuroglonun yaratmalarını okullarda, üüsek üüretmäk kurumnarında üürenerlär. Onun aaraştırmaları genç bilimcilerä ihlam vererlär.
«Hodullanȇrım, ani S.S.Kuroglo adına gimnaziyasında üürenerim».
S.Kuroglonun adını iki üüretmäk kurumu taşıyȇr: Komaratta olan gimnaziyaların birisi hem dä Dimitrovka küüyü liţeyi.
Moldovanın hem Gagauziyanın en mekalı haberleri GRTnın Telegram kanalında!