Komradın baş meydanında, ani Pobeda sokaanda bulunȇr, hergün çok maşina var. Burası büük bir parkovkaya benzeer. Meydanda durȇrlar hem özel maşinalar, hem kasaba içindä insannarı taşıyan avtobuslar. Hep ölä meydanda çok yayan gezän insan var. Onnar söleerlär, ani burada bulunan maşinalar onnara köstek koyȇrlar. Hem sayȇrlar, ani burada var nasıl yol razgelmelär dä olsunar. Ne bunun için söleerlär erli primariyanın temsilcileri hem poliţiya izmetin uzmannarı açıklȇȇrız sıradakı süjetimizdä.
Komradın baş meydanında koyulu maşinalar engel ederlär hem yayan gezän insannara, hem dä insanı kasaba içindä taşiyan avtobuslara, söleerlär kasabanın yaşayannarı.
«Aşaa kalan sokaklarda var nicä parkovka yapmaa. Ozaman hepsi sırasıyca olacȇk. Eni panayırın yanında da parkovkaya deyni er var. Orası şindi boş. Var nicä orada koşulları kurmaa».
«Taa başka bir erdä parkovka olsun. Ozaman taa kolay olacȇk. Küülerdän insannar gelerlär da kendi maşinalarını burada brakȇrlar. Sanȇrım, ani komratlıların maşinaları burada pek çok diil. Başka birerdä parkovka olsa taa iislää olacȇk».
«Üç katlı parkovka yapsınnar lääzım. Nicä büük kasabalarda. Ozaman hepsi başka türlü olacȇk. Birinci katta olan maşinalar çıkacȇklar — gireceklär. 2, 3, 4 katta var nasıl taa çok dursunnar maşinalar. Bu en dooru karar benim bakışıma görä. Bu fayda getirecek hem büdjetimizä hem primariyamıza. Hepsinä taa islää olacȇk».
Komradın başın yardımcısı Viktor Baldji söledi, ani meydanda çok sayıda maşina toplanȇr çünkü burada alış-veriş yapılȇr.
«Biz bizim muniţipal poliţiyamızlan baalantıda bulunȇrız. Burada çok maşina toplanȇr o beterä, ani sokakta alış-veriş proţesi gider. Poliţiya uzmannarı primariyanın işçilerinnän barabar bu sokaklara çıkȇrlar hem da kanon bozulmaklarını sayıya koyȇrlar»,- Viktor Baldji söledi .
Komradın yaşayannarı söleerlär, ani onnar meydanda kendilerini hatalı duyȇrlar .Çok maşina var, da bu beterä yol razgelmeleri olsun var nasıl.
«Diil islää. Ama ne yapmaa».
«Lääzım göz altında tutsunnar? Ne biliim. Bu onnarın işi».
«Kontrol olsun lääzm. Burada ucunu bulmaa yok nicä».
«Elbetki lääzım yapsınnar. Ama yapmȇȇrlar».
«Bu maşinalar bizä köstek koyȇrlar. Haliz onnar, ani trotuarların üstündä durȇrlar. O beterä, ani onnar diil dooru koyulu, bän lääzım onnarı dolaylayalım».
Poliţiya uzmannarı haberledilär, ani kasaba meydanında lääzımnı nışannar koyuldu, onnara görä dä maşinalar gezsinnär lääzım. Moldovanın ceza kodeksindä ikinci payında 288 statyasında yazılı, ani şoferlar, angıları kendi maşinaları dooru erdä koymadılar, 900 leydän 1500 leya kadar ceza var nicä kabletsinnär. Bundan kaarä onnara 5 ceza balı koyulȇr.
