Parlament seçimnerin yaklaşmasınnan diil devlet kuruluşları, angıları insannarın hakların korumasınnan zanaatlanȇrlar, urgulȇrlar, ani bitki vakıtlar durum taa ii oldu, ne baalı kolaylıksız insannarın seçim bölümnerinä çıkmasınnan. Ama var taa bir sıra problemalar, angılarını kuvetlär lääzım kararlasınnar.
Merkez seçim komisiyası hazırladı kartayı, nekadar uygun seçim bölümneri kolaylıksız insannar için. Haberlerä görä, angıları 2024-cü yılda açıklandılar, belli oldu, ani seçim bölümnerin salt 8 % uyȇr kolaylıksız insannar için, 35 % kimi koşullar var, ama 56 % bölümneri hiç diil bakılı bölä insannar için. Bakmayarak hepsi zorluklara, angılarınnan karşı gelerlär kolaylıksız insannar, onnar bulȇrlar, nasıl katılmaa seçimnerä hem kendi hakını kullanmaa. Bu hep ölä bakılȇr seçim için kodeksindä hem Merkez seçim komisiyasının reglamentindä, neredä belli edili kolaylıksız insannarın hakı seçimnerdä pay almaa deyni, nışannadı ürist Evgeniy Hadji: «En ilkin herbir seçim bölümündä panduslar olsunnar lääzım. Hep ölä o insannarda, kimin yok kolaylıı gelmää seçim bölümnerinä, var hak vermää danışmayı komisiyaya ya telefon aşırı yada kiyatta yazılı, ki Merkez Seçim komisiyası azaları ona evä gelsinnär, da o kendi sesini veräbilsin».
Bitki vakıtlar bizim devletimizdä gözlediler progres, ne baalı kolaylıksız insannarın seçim bölümnerinä çıkmasınnan, sayȇrlar ekspertlär. Taa ii oldular yollar, panduslar konuldular, seçim bölümnerindä lääzımnı nışannar konuldular. Ama bakmayarak buna, kolaylıksız insannarda hep okadar var kimi problemalar ses vermesinnän baalı, ekledi Evgeniy Hadji. O nışannadı, ani kanonnan bakılı o kişilerin cezalaması, angıları bozȇrlar kolaylıksız insannarın ses vermäk haklarını.
«Onnar cuvap edeceklär ceza hem zından kodekslerinä görä. Karşı geldiynän bu gibi problemalarlan, kolaylıksız insannarın var hakları danışsınnar Merkez Seçim komisiyasına, ani onnarın ses vermäk hakları bozulȇrlar. Ama eer seçimnär geçtisäydilär dä ona bölä hak verilmedi, ozaman lääzım poliţiyaya danışmaa»,- nışannadı ürist Evgeniy Hadji.
Pek önemni, ki ileriya dooru da Seçim komisiyaların azalarını üüretmää kolaylıksız insannarlan dooru işlemää, neçinki var ölä olaylar, açan bu kategoriyadan insannarın hısımnarı saymȇȇrlar onnarın haklarını, da onnar katılamȇȇrlar seçimnerä.
«Var ölä olaylar, açan ev saabileri kolvermeerlär komissiyayı, da onun azaları girämeerlär içeri, yatalak yada kolaylıksız insannar versinnär kendi sesini .Söleyeräk, ani kişi yok evdä, yada onun bişeydan annaması yok. Bu hepsi insan hakların bozulmasına getirer. Ama komisiya bölä olayları sayıya koymȇȇr. Onnar gelip , ev içinä kolvermediynän, giderlär ötää dooru. Ama bölä olaylar mutlaka esaba lääzım alınsınnar, zerä bu seçim için kodeksin kurallarına karşı gider»,- nışannadı ürist.
Moldovada yaşeer 162 bindän zeedä kolaylıksız insan, ne kurȇr yakın 6,5% devlet insannarın bütün sayısından.
Moldovanın hem Gagauziyanın en mekalı haberleri GRTnın Telegram kanalında!