Her yıl oktäbr ayın bitki pazarında Moldovada vakıt diiştiriler. Bu yıl saatları bir saada geeri oktäbrinin 26-sından – 27-sinä karşı gecesi çevirmää lääzım.
Yaz hem kış vakıdı si̇stemasına görä her yıl saatları bi̇r saada ya i̇leri̇ yada geeri̇ geçi̇rerlär. Yaşayannar nışannȇȇrlar, ani ilk aftalar vakıdın diişmesinä zor sınaşmaa , ama bu işin ii tarafları da var.
«Şkola yıllarından taa aklımda tutȇrım, nesoy zordu eni vakıda sınaşmaa. Büün ama bän şansora universitetı başardım, işlerim hem bana deyni diil önemni vakıt. Bän var nicä karannıkta da işimi gerçekleyim. İlk aftalar sade biraz zor, çünkü güüdemizin biolocik saatları da sınaşsınnar lääzım».
«Uşaa taa uygun şkolaya getirmää, dışarda aydınnık sabaaylen».
«Vakıdın diişmesinä pek hızlı sınaşȇrım».
«Biz şansora ihtärız, karannık oldu, içeri gireriz. Te o analara, angılarının uşakları var, taa zor sınaşmaa bu vakıda».
«Benim 3 toruncuum var, onnarlan geç vakıdadan içerdäyim, vakıdın diişmesini duymȇȇrım».
«Sayȇrım, ani vakıdı yakışȇr diiştirmesinnär dä. Bu uykumuzun zamanında belli olȇr, yaşlı insannara bu işä sınaşmaa zor».
«Saatları pek çok yıl sıravardı diiştirerlär. Elbetki ilk aftalar buna sınaşmaa lääzım, bän işleerim hem bana biraz zorca geler. Ama sayȇrım, ani diil lääzım diiştirsinnär, ko bir vakıt hererdä olsun. Biz Russiyanın programalarını siirederiz, bu bizä taa uygun, açan vakıt hererdä birtürlü».
İlerdän vakıdın diişmesi elektrik energiyanın koorutmasına dooruduluydu, ama bitki vakıtlar bu soruşun dolayında çok diskussiya peydalanȇr.
«Vakıdı ilerdän diiştirärdilär energiyayı koorutmaa deyni, ama devletlerin taa çoyu vakıdın energiya korunması soruşunda faydalı olmadıını annadıynan,bu işi yapmaa vazgeçtilär. Sayȇrım, ani büünkü gündä saatların oklarını diiştirmäk dooru diil».
«Bän bilerim, ani bu soruş için çoktan lafederlär. Gençlär vakıdın diişmesini kolay geçirerlär, ama yaşlı insannara taa zorca. İşittim, ani var lafta diiştirmää bu sistemayı, sayȇrım, ani diil lääzım saatları diiştirmää».
«İi olaceydı, eer vakıdı diiştirmäzdilär. İnsan sınaşȇr bir vakıda. Diylim kayıl saatların diiştirilmesininnän».
İlk sıra saatların oklarını diiştirdilär neetlän korutmaa energetika resurslarını. Bu iş 1908-ci yılda Velikobritaniyada oldu. Moldovada vakıdı diiştirerlär 1979-cü yıldan beeri.
Avtor: A.Terzi, operator: S.Georgiev, montaj: A.Gerçu.