Güneşli günnär hep taa sevindirer insannarı, bakmayarak buna diil uzakta suuklar da. Bu vakıda yaşayannar savaşȇrlar ilerdän hazır olmaa, yakacakları hazırlayıp. Hazır mı Komrat daa çorbacılıı insana eterli yakacak vermää, bizim çekim grupamız aaraştırdı.
Yakacakların hazırlaması bu güz Gagauziyanın hepsi dolayların daalarında geçirilecek. Butakım plannanȇr, ki yakacakların sayısı lääzım etişsin. Bu sezonda 8 bin skladometra yakacak hazırlanacek, bunu «Daa çorbacılıı» kurumun başı Aleksandr Peykov haberledi.
«Bitki yıllar biz 12-15 bin skladometra yakacak hazırlardık. O yıllar yakacak etişmäzdi insana. Büünkü günnär yaşayannar hep satın alȇrlar, ama diil okadar çok hem sık. Düşünerim, ki hepsinä etişecek»,- dedi Petkov.
Neredän alınacek yakacaklar maasuz komisiya ilerdän belli eder, nışannadı Aleksandr Peykov.
«Bir sıra 10 yılda belli ediler, neredä daalar paklanılacek. Bu yapılȇr, ki fidannar kurumasınar da genç fidancıklar ileri büüsünär»,- ekledi o.
Ne baalı fidannarın çeşitlerinnän, insannarda var kolaylık ayırmaa.
«Bitki 2-3-5 yıllar klimat diişti, büük temperaturalar kalkȇr. Akaţiya kurumaa başladı, bu üzerä genç fidannarı da kimär sıra razgeler kesmää. Başka fidannarın soyları, ölä nicä väz, glädiçiya, sofora, yasen- hepsi onnar üüsek temperaturalara taa dayanıklı»,- nışannadı uzman.
Büük problema kalȇr kanona kaarşı daaların kesmesi hem yakacakların çalması da. Sade bu yıl yakın 65 skladometra daa çalındı.
«Barabar iç işlerin hem ekologiya kurumnarınnan grafik yapılı, sık reydları geçireriz. Ama prost, ani insan çalınmış yakacakları satın alȇr. Er bu olmaydı, da bu insannara deyni kanonnar taa çetin olaydı, bekim hepsini bunu vardı nasıl durgutmaa»,- söledi Aleksandr.
Bu güz çetin yakacakların sayısı 1150 ley kurȇr, yımışak yakacakların paası 950 kurȇr- eer kişi kendisi daa içindän yakacakları çıkarȇr. Eer yakacakları kurumun transportu evä getirer, ozaman paalar taa üüsek, bakarak, nereyi onnar getiriler.
Avtor: L. Novak , operator: A. Glekov, montaj: A. Topal