Sovet vakıdında, açan hristiannık dini devletlän kontrol edilärdi, Kıpçak küüyün klisenin açılması için çok var nicä annatsın bu yaşamak erin yaşayanı İvan Karakalçev. Onun yaşamak istoriyası koolamak zamannarında örnek olȇr.
İvan Karakalçev duudu 1941-ci yılda Kıpçak küüyündä. Burada o büüdü, okulu başardı, aylesini kurdu. O da geldi 1960-cı yıla, açan pravoslav dinin yaşadılması hem ilerlemesi zap edilärdi, çoyu kliseleleri kapardılar, kimilerini da daadardılar. Panayıyanın adına klisesi Kopçakta bu olaylardan bir tarafa kalmadı. İvan Gerogieviçin karısı Olga Karakalçeva 1975-ci yılda geçinmiş. Küüdä çünkü klisä kapalıymıştı, İvan Georgieviç zorunda Aleksandrovka küüyün monastırinä başlamış gitmää. Godärmişti da yayan.
«Orayı gittik 80-ci yıladan, 6 yıl. Sora açıldı Taraklıda. Başladı avtobus gezmää Bolgrada. Kolhoz verärdi maşına, ani insana taa ilin olsun gezmää. Ölä geldim bän inana, ani Boji beni çaardı öldüynän hozäykam, bän başladım hınşır gezmää»,- Kıpçak küüyün yaşayanı İvan Karakalçev annattı.
İvan Georgieviç aklısına getirder, ani o 1970-ci yıllarda küülülerin yaşayannarı klisenin enidän açılması için akıntıyı kurmuşlar.Bu işin iniţiatoru ozaman oldu boba Nikodim Nedöglo. Bu istoriya sayfalarını tutȇr aklısında İvan Karakalçev.
«Onnan biz birerdä kliseyä gidärdik, o açtı bu lafı, ani ihtiarlarımız bizim küüdä lääzım kliseyä gitsinnär. Hem yakın olacek, hem taa ilin. Aleksandrovka monastırinä yayan gidärdik, 25 km orayıdan buradan»,- İvan Georgieviç annattı.
18 kişilik bölük, İvan Karakalçevlan birerdä klisenin küüdä açılması için kaçınarmıştılar. Mektuplan erindeki, dolay, devletin merkez kuvetlerinä, eparhiyaya danışmıştılar.
«Oradan gelincä küüyä, kuvetlär şansora bilärdilär, sordular, korkuttular, ani siz agitator. Gençlerä yoktu nicä, ama pensionerlara bişey yapamardılar. Başladık yazmaa Moskvaya. Birdän cuvap vermedilär hem çok kerä sakladılar, ani klisä açılmasın»,- ekledi o.
Kıpçaan Panayıya adına klisesi 1960-1988-dan kapalı durmuş.
«28 yıl kapalı durdu klisä. Kolhoz kullandı sklad erinä. Koydular arpacık, suan. 1973 yılda boşalttılar içindän ikonaları, hepsini ne vardı, kolhozun stroitelnıy skladına koydular. İçini boşalttılar»,- nışannadı İvan.
İvan Georgieviçin laflarına görä, 1988-ci yılda Moskvadan izin gelmiş Kıpçak küüyündä kliseyi açmaa. Primar, partorg hem kolhozun başı çaarmışlar İvan Georgieviçi takazalamaa.
«Suditedecez deerlär. Bän kaybetmedim kendimi. Çıkarın reşeniyayı, zerä yarın insanı toplayacez. Böleliklän klisemiz açıldı»,- nışannadı İvan Georgieviç.
Kıpçaan klisesinin enidän açılması için, İvan Georgieviç Karakalçev Viktor Kopuşçyulan birliktä düşünüp, klisenin var olan istoriyasını tiparlamışlar. Kiyadın adı «Материалы по истории успенской церкви села Копчак». Kiyat 2019-cu yılda çıkmış.Büünkü gündä Panayıya adına klisesi Kıpçakta işleer, yanında da eni klise düzüler. O yapılȇr yaşayannarın yardımınnan. Bu hayırlı işä küüyün büüyü-küçüü katılȇr.
