Yanvarin 25 Tatiyananın günü nışannanȇr. Hep ölä bu gündä studentlär dä bu günü bakȇrlar.
Tatyananın günündä pravoslav hristiannarı Rimskaya Tatiyanayı anȇrlar. 226 yılda onu öldürmüşlär, çünkü o Hristian inanında bulunarmıştı. Studentlär sa kendi gününü 1775 yıldan beeri nışannanȇȇrlar. Ozaman bu kararı imperatriţa Elizaveta kabletti. Hepsini kendi erlerinä koymaa hem sıraya koymaa – busoy Tatiyana adı grek dilindän çeveriler.
GRT-nın arasında var uzman, angısının adı Tatiyana Stavilova. O artık 20 yıldan zeedä burada işini götürer. Büünkü gündä o haberlär redaktoru. Tatiyana kendi işini becerekli hem üüsek uurda getirer. GRT-ya taa student olarak geldi, burada praktikayı geçti, nedän sora işlemää kaldı korrespondent olarak. 20 yılın içindä redaktor görevinä etişti.
«Var nasıl söleyim, ani Tatyana benim studentkam. Bän onu taa universitet yıllarından bilerim. Ozamandan taa becerekli kendi işindä, dedikçi hem kendi kuvetlerinä emin bir insan. Taa ozaman sölärdi, ani TV-da jurnalist olarak işlemää isteer. Sevinerim, ani büünkü gündä Tatiyana bizim aramızda işleer. Var nasıl söleyim, ani o benim saa elim»,- nışannadı baş redaktor Valentina Koroläk.
Tatiyananın kollegaları sölerlär onun profesional işi için.
«Tatiyana üüsek uurda götürer kendi çalışmalarını. O bizä da bölä sert hem kendisinä da davranȇr, çünkü bizim işimiz lääzım vakıdında çıksın, vakıdında biz lääzım kölverimleri yapalım»,- dedi jurnalist Natalya Jelezova.
Tatyana sadece işi sıraya koymȇȇr. O hep ölä kollegalarına ihlam verer hem yardım eder kendi potenţialını açıklamaa.
«O herbir süjetä cuvaplıklan yaklaşȇr. Birliktä studentlärlän düşünerlär, netürlü bu süjetı yapmaa hem çıkarmaa. Herbirinä yardım eder türlü incelikleri bulmaa hem üzä çıkarmaa. O çalışȇr, ki bizim süjetlerimiz meraklı olsunnar»,- ekledi Koroläk.
Haber redaktoru olmaa halizdän zor bir iş, sayȇr GRT-nın genç çalışanı Polina Slavova. Ama o sayȇr, ani Tatiyana bu işi başarılı hem becerekli yapȇr.
«O hiç bir zaman sesini kaldırmȇȇr hem hiç kimseya üfkelenmeer. O her kerä bizä söleer: „Hepsiniz raat olun, ișini yapınız da hepsi ii olacek»,- söledi Polina, GRT-nın korespondenti.
«Halizdän bir insan büük harftan. Sizä herzaman, kim dä yaklaşmasın, siz paylaşacenız kendi bilgilärlan. Siz kuancıksınız. Bän sayȇrım kendimi pek kısmetli, ki bu 20 yılların süresindä çalışȇrım barabar sizinnän»,- sayȇr Polina Barbova, jurnalist.
Tatiyanaların günündä GRT-nın kolektivi şükür eder Stavilova Tatyanayı onun işi için hem GRT-nın ilerlemäk çalışmaları için.
«Kötü o üürenici, angısı kendi üüredicisindän taa ii olmaa istämeer – bu laflarlan Tatiyanaya danışmaa isteerim. Sayȇrım, ani o işidecek benim nasaatımı da yıllar geçtikçä o GRT-nın başına konacek. İnanȇrım, ani o bunu becerecek»,- nışannadı baş redaktor.
