«Oguzsatlink» hem «İLK HALK TELEVİZİONU» Komratta hem Kirsovo küüyündä durguttu kendi işini. Aaraştırmanın süresindä, angısını geçirdilär vergi izmetin uzmannarı barabar «Fulger» maasuz izmetinnän, alındılar tertiplär, dokumentlär, kasa çekları hem da kablo televizionun işi durgundu. Aaraştırmanın sebepinnän oldu o, ani operatorda yoktu liţenziya kendi işini götürmää.
Vergi izmetin hırsızlık olaylarınnan güreşmäk bölümün uzmannarı barabar «Fulger» maasuz izmetinnän hem poliţiyaylan geçirdilär aaraştırmakları, neredä kablo yayının operatorunu kabaatlı bulȇrlar kanona karşı gelirlerin kabletmesindä, haberlener Moldova devletin Vergi izmetin saytında. Gagauziya baamsız jurnalistika merkezi başı Stepan Piron annattı, nicä aaraştırmaklar geçtilär: «Bir sıradan gün. İnsan kendi iş erlerindä çalışȇr. Girer 15 kişi, onu onnardan maskaylan. «Fulger» komandası».
Vergi izmetin temsilcileri nışannadılar, ani zından iş kablo operatorun üstünä açıldı 2024-cü yılın may ayında.
«Zından iş bu soruşta çekettirildi 2024-cü yılın may ayında vergi izmetin aaraştırmak organnarınnan, alarak esaba şüpeleri Zından kodeksin kanon bozulmaklarda 241-ci statyasının, ikinci bölümün, f punktuna görä. Materiallara görä, kişilerin grupası Gagauziyada kurdu bir hırsızlık shemasını da kullandı onu 2013-cü yıldan büünkü günädän türlü kompaniyaların yardımınnan», — nışannadı Vergi izmeti.
Aaraştırmakların süresindä operatordan alındılar kompüter tehnikası, tertiplär, angıları videoları gösterärdilär, dokumentlär, angıları göstererlär birgünnük gelirlerin sayısını hem da paralar türlü valütada- 3 bin 300 dollar, 9 bin 920 evro, 72 bin 940 ley hem 12 bin 750 belorusiya rublası. Gagauziya baamsız jurnalistika merkezi başı Stepan Piron danıştı yaşayannara, neçinki kablo televizionu işlämeer.
«Var nicä söleyim, ani bakmayarak problemalara, angıları peydalandılar Gagauziya haberlemäk uurunda, hepsi olacek islää da insanı Eni yılı için sevinderecez»,- Stepan Piron annattı.
Bu yılın avgust ayında iki kablo baalantısı, angıları Komrat kasabasında işleerlär, kablettilär ceza 300 bin leydän taa zeedä yannışlıklar için. Aaraştırmaklar ilerlenerlär, da onnarın süresindä kanona görä kişilerä kabaatsızlık prezumpţiyası kullanılȇr.
