Çok zanaat var dünnedä. Ama zanaatlardan kaarä – Allahtan verilän talantlar da var. Bu insannarın birisi – K.İ.Kurdoglo. Bu adam kendi yaşamasını ana küüyünä – Baurçuya, halkına, hem Vatanına adadı.
«Bän yaşȇȇrım bu küüdä diil boşuna, bän üürendim köklerimi, bän mutluyum. Üürendim bir, ama Allaa bana verdi kısmet yazmaa kiyat. Gösterdi, nicä yazmaa kiyatları da ne kiyatlarda brakmaa. Da bän olmayacam, hepsi yaşȇȇr bir parça vakıt. Ama o kiyadı açacȇklar, göreceklär da söleyeceklär- te bu gagauzların istoriyası. Ama benim vakıdımda yoktu istoriya. Yapmışlar bölä bütündän hepsini. Küüyün yoktu bişeysi. Bir dä kiyat yoktu küüdä. Bän bununnan üünmerim, bän buna sevinerim. Da isteerim yazsın başkası da ölä»,- annattı Kurdoglo.
Konstantin Kurdoglo 15 kiyattan zeedä hazırladı hem tiparladı. Hepsi onnar gagauzların ecelindä olan acıylan dolu sayfaları açıklȇȇrlar – kara 46, represiyalar, ikinci dünnä cengi, Afgan cengi, hem başka. Sadecä bir kendisi Konstantin İvanoviç biler, nekadar zaamet koydu, bu kiyatlar için materialları toplamaa deyni kaç saat arhivlerdä bulundu.
«Allaa açtı bu yolu. Bän diilim istorik, ama o gösterdi nasıl yazmaa. Ama çok lääzım işlemää. Çok lääzım çalışmaa, vermää bütün kuvedini, vakıdını, büük istemek. Yanasın lääzım, başka türlü olmayacȇk»,- ekledi yazıcı.
Duudu o çok uşaklı ayledä 1957 yılında. Zoru da, iilii dä gördü. Küçüklüündän kiyatlara çekilärdi.
«Pek önemni hem paalı er, zerä bu şkolada bän üürendim on klas. İşledim burada üüredici dä. Kısmetliyim bunnan da. İstäärdim başka bir zanaat almaa, ama uymadı. Askerdä ofiţer olmaa istärdim, uçaklarda uçmaa, amma o uymadı saalık tarafından. Sora bän pek beendim üüredici yolunu. Bitirdim institutu da geldim sport uurunda uşaklara- saalık verdim, terbi ettim»,- nışannadı yazıcı.
Bezbelli, bu araştırıcı damarı taa okul yıllarında dürtmää başladı. Da sonuçta K. Krdoglo buncak vakıdını hem kuvedini aaraştırmak işinä adadı. Canını dürtän soruşlara cuvapları aarayarak, bütün halkımıza şindiyadan bilinmeyän işleri açıkladı. Nicä Bucaan insannarı kara aaçlıı geçirdilär, kaç kişi kaybeldi 46-47 yıllarda bu erin üzündän. Nicä insannarı 49 evlerindän kırladıp, uzak hem suuk erlerä kaldırıldılar. Bu acıylan dolu istoriya sayflarımızı K. Kurdoglo kendi kiyatlarında açıklȇȇr. Halkımızın eski yaralarını deşer. İsteyiptä bunu yapȇr. Çünkü isteer, ki bu olaylar unudulmasınnar. Çünkü isteer, ki cümnemiz, kuvetlär dooru sonuçları yapsınnar, da bu olaylar hiç bir zaman tekrarlanmasınnar. Bakınız, nekadar büük sevgiylän K. Kurdoglo ana küüyü için annadȇr, vereräk cuvap taa bir önemni soruşa.
«Bilim uurundan Baurçi — o tatar, bir nagaeţ. Ama insanın arasında, te siz geldiniz Kongaz tarafından, bakın küüyä – bayır içi iki taraftan. Var yamaç Çadır tarafından hem Kongaz tarafından. Baurçi çeviriler tatar dilindän nicä kısmetli»,- çizgiledi Konstantin Kurdoglo.
Kısmetli diil sade Baurçulular, ani aralarında bölä adam yaşȇȇr, ama gagauz halkı da kısmetli, çünkü K.İ.Kurdoglunun hatırınnan geçmiştä kalan olaylar için geniştän üürendi.
