Komrat dolay bolniţasının Aziz Sancar adına ilaçalamak-diagnostika korpusunda işimiya insultunu ilaçalmak merkezi açıldı. Onu Saalıı korumak ministerliin «Kaliteli ilaçalamayı ilerletmäk» programasına görä açtılar. Açılış ţeremoniyasında bulundular Gagauziyanın Saalıı korumak bakannıın temsilcileri hem nevrologiya, reabilitaţiya uurlarında uzmnaar.
Bu yıl Komrat dolay bolniţasında 30 paţient insultlan trombolizis terapiyanın ilaçlamasını kablettilär. Var olan patalogiyanın kaliteli ilaçlaması için mediţina kurumunda diagnostika merkezi açıldı. Zamandaş kompyuter tomografiya hem başka aparatlar bulunȇrlar burada, söledi Komradın dolay bolniţasının başı Nina Raylän.
«Ȇlektroȇnţifolograf, medik krivatları, laboratoriya tertipleri, angıları yardım ederlär ilacın ölçüsünü belli etmää. Biz şindi kırmızı zonada bulunȇrız, nereyä en ilk paţientleri getirerlär. Buradakı bakmasından sora, kompyuter tomografiyasını maasuz odada geçirerlär. Bundan sora terapiya yapılȇr»,- söledi Nina Raylän.
İnsult insanı kötü duruma getirer, söleerlär uzmannar. İnsanın bölä durumu hızlı medik yardımına sorumu var. Gagauziyaya insult hastallıın ilaçlaması için bölä merkez lääzımnı, belli eder Saalıı korumak bakannıın başı Ȇdgar Dimov : «İlk saatlarda diagnostika pek önemni. Hastada var iki- dört saat. Hızlı medik yardımı izmeti getirer hastayı merkezä, neredä ona diagnostika yapılȇr, da sora insan reabilitaţiyayı geçer, ayaa kalkȇr hem saalıklı yaşamaa çekeder».
Eni merkezdä olacȇk reabilitaţiya bölümü dä, neredä paţientlär insulttan sora ayaa kalkacȇklar.
«İnsult- o patologiya, angısı insanı kolaylıksız brakȇr. Bunun için pek islää, ani mediţina tehnologiyaları ilerleerlär. Da büün var ilaçlamak metodları, angıları yardım ederlär paţientin yaşamasını korumaa hem onun yaşamak kalitesini taa ii yapmaa»,- söledi Komradın dolay bolniţasının başı Nina Raylän.
Uzmannarın laflarına görä vakıtçasına diagnostikanın geçirmesi hem ilaçlaması — o baş faktorlar, angıları hastayı ayaa kaldırȇrlar.
«Pek önemni, ki paţient vakıtlan bizä gelsin, ilk nışannarın peydalanmasından sora. Lääzım taa hızlı aylä doktora danışmaa yada hızlı medik izmetini çaarmaa».
Nevrolog Anna Çebanova bitki yıl işledi insultlan hastalarlan.
«Bir yılın içindä kabledärdim paţientleri. Eni kompyüter tomografı, telemediţina, ekspres- çeklar, damar detektoru yardım ederlär kullanmaa lääzımnı hem faydalı ilaçlamayı»,- Anna Çebanova dedi.
İnsult merkezi işleer barabar aylä doktorlarınnan hem hızlı medik yardım izmetinnän.
«Belli edärkän bölä patologiyayı baalanȇrız bolniţaların kabletmäk bölümnerinnän da getireriz hastaları, angılarına kompüter tomografiyasını yapȇrlar»,- nışannadı Vitaliy Dragoy.
Gagauziya başkanı Evgeniya Guţul inanȇr, ani eni klinika yardım edecek aazaltmaa insult hastalıını geçirän paţientlerin sayısını.
«Biz savaşacȇz hepsini yapmaa, ki saalıı korumak bakannıı genişletsin kendi işini»,- nışannadı başkan.
İnsult bölümü Komratta bütün devlettä var olannarın merkezlerin içindä onbirinci. Gagauziyada o ilk.
