Avtonomiyanın başları çalışȇrlar ilerletmää sportu regionda hem kurmaa sportçulara ii koşulları. Bu neetlän açıldı regional şahmata hem şaşki okulu, angısına musafir gibi geldi Gagauziyanın başı Evgeniya Guţul, Gagauziya şahmata federaţiyası başı Viktor Petrov hem Gençlik hem sport bakanı Väçeslav Dragoy.
Regional şahmata hem şaşki okuluna gezer 70 uşaktan zeedä, ama isteyennerin sayısı taa zeedä. Her yıl okulun kumbarasına sportçular getirerlär eni ödülleri. Mardın çeketmesindä uşaklar pay aldılar devlet yarışmaklaraında, angılarından döndülär evä beş ödüllän. Nicä söleerlär musafirlär, baaşışsız gelinmeer, ölä bu sefer dä regionun kuvetleri baaşışladılar okula büük televizor, ki trenerlerin olsun kolaylıkları uşaklara göstermää anılmış oyuncuların partiyalarını, yapmaa analız kendi oyunnarına hem üürenmää eni bilgileri şaşki hem şahmata uurunda. Avtonomiyanın başı Evgeniya Guţul nışannadı, ani var neeti gelmää da görmää, nicä eni yapıda erleştilär uşaklar, ne taa lääzım yapmaa, ki onnar ii koşullarda üürensinnär, kazansınnar üüsek erleri.
«Saa ol sizä, ki siz üüredersiniz bizim uşakları, çünkü burada lääzım dayanmak, sigurluk, olmaa dikkat hem şahmata yardım eder uşaklara üüremektä dä»,- Evgeniya Guţul nışannadı.
Gagauziya şahmata federaţiyası başı Viktor Petrov nışannadı şahmata вукыдукшт önemтiin hem urguladı, ani koyacek bütün kuvedini, ki uşaklar geçirsinnär sınışları ii koşullarda.
«Büün bizdä var neylän hodullanmaa, var ii çıkışlar, bizim okul oldu regional okulu. Biz plannadık ilerletmää hem açmaa filialları Çadır hem Valkaneş kasabalarında. Neçinki annȇȇrız bu spordun lääzımnıını genç olannara deyni»,-Viktor Petrov nışannadı.
Okul başı İvan Velikoglu çizgiledi, ani uşakların üüsek hazırmaları sınışlarda vererlär ii çıkışları. Büün var kiminnän hem neylän hodulanmaa.
«Bu yıl 10 gün geeri başarıldı Moldova çempionatı, biz getirdik 5 priz erini çoyu yaş kategoriyalarda»,- İvan Velikoglu çizgiledi.
Gagauziya regional okulu dördüncü devlettä hem ikinci reytinga görä. Nicä nışannadı gençlik hem sport bakanı Väçeslav Dragoy , bu tek okul, angısında büün var kendi yapısı hem uşaklara deyni kurulu ii koşullar.
«Halizdän bu sport çeşiti, şahmata hem şaşki yardım ederlär uşaklara taa dikkat olmaa, esaplı, üürederlär disţiplinaya, taa ii onnar düşünerlär. Umutlanȇrım, ani bizä uyacek açmaa eni korpusu, ki genişletmää hem zeedeletmää uşakların sayısını»,- nışannadı gençlik hem sport bakanı Väçeslav Dragoy.
Devlet çempionnarı hem hep ölä halklararası yarışmakların tarayıcıları baaladılar kendi yaşamalarını şahmata oynusunnan. Büün onnar hodulluklan söleerlär, nicä kalkȇȇrlar şannı pyedestala.
«Şahmataları ayırdım , neçinki bu intelektual oyun, angısını bän pek beenerim taa küçüktän».
«Neçinki onnar kaavileştirer fikirini, matematikada da yardım ederlär».
«Kaavi yarışmaklarda konkurentlarım, ama biz hazırlandık bütün yıl trenerlärlän. Da erlem kazanmadıysan er, diil lääzım gücenmää, ama gitmää ileri».
Vizitin süresindä Gagauziya Başkanı verdi şannı ödülü «30 yıl Avtonomiyaya» şahmata hem şaşki terenerinä hem aktivistinä Andrey Çeşmedjıya, angısı koydu çok kuvet, ki kaldırmaa bu sport zanaatlarını üüsek uura hem kurmaa regional şaşki hem şahmata okulunu.
Moldovanın hem Gagauziyanın en mekalı haberleri GRTnın Telegram kanalında!