Gagauziyada Holokost kurbannarın gününü anȇrlar. 2016 yılda Moldovanın Parlamenti kabletti deklaraţiyayı, angısınnan kabletti Halkalar arası Holokost aarıştırmak raportunu, yanvarin 27 sa Moldovada haberlendi Holokost kurbannarın anmak günü. Bu gün –tragediya olayların anması hem bir ders, nekadar önemni tekrarlamamaa istoriyanın yannışıklarını. Gagauziyanın okullarında geçtilär türlü olaylar baalı bu dataylan. Nicä geçti anmak günü Komrat Tretiyakov adına liţeyindä bizim sıradakı süjetimizdä.
Yanvarin 27-dä bakılȇr Holokost kurbannarın anmak günü. Bu gündä getirerlär aklına onnarı, kim geçindi bu olayların sırasında. Kabaatsız insannar uslu yaşamak için düş güdärdilär, ama bir saatta bu düşlär yıkıldı. Çoyu insannar düştülär ölüm lagerlerinä yada gettoya. Olay baalı bu günnän geçti Komrat Tretiyakov adına okulunda. Nicä nışannadı istoriya üüredicisi Olga Novi̇kova bu dersin neeti — annatmaa hem getirtmää uşakların aklına istoriyanın kara sayfalarını.
«Bu dersin neeti – yapalım ölä, ani bu tragediya tekrarlanmasın. Açan biz uşaklarlan lafettik İkinci dünnä cengi için, biz lafettik Holokost için. Gördüm, ani uşaklar artık bilerlär, naşeysä okumuşlar, kino siirettilär. Onnar artık tanıştık bu temaylan. Onnarlan çalışmaa kolay. Onnar annȇȇrlar bu olayların zararını hem, bana geler, ani onnar brakmayaceklar bu tekrarlansın, çünkü büünkü uşaklarımız çok ii üürektän, onnar annȇȇrlar, ani insanın yaşaması paasız bir baaşış, angısı sade Allahtan veriler»,- nışannadı istoriya üüredicisi Olga Novi̇kova .
Sadece birkaç yılın içindä hepsi ölüm lagerlerindä 6 miliondan zeedä insan geçindi. Uşaklar lafettilär Holokost korku sţenalar için, geçinmiş insannar için.
«Bän annardım, bekläärdim, ani bu zor bir ders olacek, bilärdim, ani aar duygularımız olacek, ama diil okadaradak. Bakȇrsın, seslersin da canını saplȇr. En çok şaştım ona, ani küçük uşakları da öldürardilär, uşakları, angıların kabaatı hiç yok, onnarı da sevmedilär».
«Bu ders hepsimizä gettirtti aklımıza, ani lääzım koruyalım hem analım bu istoriya olayları, düşünelim, nedän oldu bu tragediya hem annayalım, ani hepsimiz bir soydayız, hepsimiz insanız hem düşünmeyelim, ani biz yakışȇr öldürelim kimisäydı».
«İnsannarı aaçlıkta tutardılar, koyardılar işlesinnär zor hem zararlı koşullarda fabrikalarda, angılarını düzärmişlär lagerlerin yanında… Bu insansızlıktı. Onnarı soyundurardılar, yollardılar gaz kameralarına, aylelerdän ayırardıları. Hepsini alardılar onnardan – ayleleri, adların erinä saylar kullanılardılar. Braktılar insannarı kimniksiz, namusuz, milletliksiz, kıymetsiz».
Gagauziya Başkanı Evgeniya Guţul danıştı üürenicilerä adamaklan onnar tutsunnar aklılarında Holokost tragediyayı da yapsınnar çıkışları ileriya dooru.
«Açan bakȇrsın bu materiallara, patretlerä, resimnerä, aar duygularlan kalȇrsın. Tutup aklınımızda bizim geçmiş vakıtlarımızı, biz koruyȇrız bizim şindiki zamanımızı da ilerlederiz bizim geleceemizi. Bu olaylar diil lääzım olsunnar. Bölä insansızlık bir ayırı milletä olmaz»,- Evgeniya Guţul danıştı üürenicilerä.
Gagauziya Üüremäk Bakannıın Başı Natalia Kristeva çizgiledi, ani derslär baalı Holokost kurbannarın anmak gününnän geçerlär Gagauziyanın hepsi okullarında.
«Neçin lääzım hatırlamaa hem lafetmää bu gün için? Ne siz lääzım çıkarasınız bu derstän? Onu, ani bu diil lääzım tekrarlansın. İstoriyayı kurȇrlar insannar, hem sizin ellerinizdä olacek gelän vakıtlar, sizinnän baalı bizim geleceemiz. Bunun için lääzım yapalım çıkışları, geçmiș olaylardan üürenelim, sayalım biri birini»,- Kristeva çizgiledi .
Anmak derslär ilerleer başka okullarda da bir baş neetlän, butakım olaylar başka tekrarlanmasınnar.
