Hip-hop stili güüdenin dilini açıklȇr. Butakım oyun treneri Andrey Lira sayȇr. Bir yılın süresindä o uşakları hip-hop stilindä oyunnara Komratta D.Mavrodi adına liţeyindä üüreder.
Hip-hop oyunun sevennerin lideri hem uşakların treneri Andrey Stratu, angısı aldı Andrey Lira psevdonimı Komratta çalışȇr. Onu o, taa muzika kurumunda üürenärkän, kabletti. Trener paylaşȇr, ani kabledilän ad- Lira gösterer, nekadar sık muzika dünnesinnän baalı. Elbetki muzika meraklandırardı onu küçüklük vakıdından. Çok yıl sıradan Pridnestrovje regionunda muzika okulunda horun solistiydi.
Genç olan diil sade oyun treneri çalışȇr, ama taa kendisi dä hem oynȇȇr, hem türkü çalȇr, rejisörluk, operatorluk işinnän çalışȇr, videoklipları çıkarȇr.
Komrada Andrey Pridnestrovye regionundan geldi, neredä çok yıl sıradan oyunnan zaanatlandı. Uşakları üüredärdi hem kendisi dä grupada oynardı. Nedän sora bir pauza kararladı yapmaa, aşırıya işä gidip. Dubayda rejiser-postanovşik çalıştı. Evä dönüp, yaşamak erini kararladı diiştirmää. Sevgili işinnän Komrat kasabasında neetlendi zanaatlanmaa, oyun studiyasını açmaa.
«6 yıl geeri ilk sıra Komrada geldim. Master-klas geçirdim. Annadım, nekadar bu region meraklı. Nekadar uşaklar aktiv. Annadım, anii trener bu oyun stilindä lääzımnı, ki profesional olsun, ki kendisi dä oynamaa becersin, nekadar maasuz oyun zalası lääzımnı»,- dedi trener.
Büünkü gün oyun studiyasına türlü yaşta uşaklar gezer. En küçük üürenici 4 yaşında. Repetiţiyalar avşam vakıdında geçiriler.
«Türlü aramaklardan sora 6-cı okulda durgundum. Burada sport zalası ilerdän vardı. Kötü halda bulunardı, duvarlar nemdilär. Kendi düşünmeklerinnän okulun administraţiyasına danıştım. Onnarlan kayıl oldular, da izin verdilär ideyayı giriştirmää»,- ekledi Andrey.
Şindiki vakıt uygun, yakışıklı oyun zalasında uşaklar büük sevinmeliklän zanaatlanȇrlar.
«Taa küçüklüümdän bu oyunnarı sevärdim. Onnarın stili pek serbest. Onnarın yardımınnan kendi emoţiyalarını var nasıl göstermää».
«Düşünerim, bu oyun yardım edecek bana türlü devletleri görmää, oyun bilgilerini ilerletmää».
«Bizim trener üüreder bizi diil sade ii oynamaa, ama ilk erleri dä alma».
Andrey nışannȇȇr, ki taa ii hip-hop oyunun dünnesini duymaa oyun zalasını savaştı düzmää maasuz atmosferayı. Bunu tematika resimneri duvarlarda gösterer.
«Bän burayı resimciyi teklif ettim, Dmitriyi Svog. Kaligrafiya resimnerini duvarlarda kendiniz görersiniz. Bu maasuz stil. Neytral resimnär, ki bıkmamaa onnara. Savaştık minimalistika stilini kullanmaa, gözäl hem zamandaş olsun. Komratta vardı gördüm başkasında da gözäl zalaları, ama diil hip-hop maasuz stilindä»,- nışannadı Andrey Lira.
Andrey Stratul diil sade hip-hop oynuya uşakları üüretmää isteer, ama türlü oyun konkurslarında da ilk erleri almaa. Bundan kaarä o bulȇr vakıt türlü proektlerdä pay almaa, ölä nicä konţertlär, rejisör olmaa, videoklip yapmaa hem çok başka. Andrey Liranın zengin talantınnan taa ii tanışmaa var kolaylık “Ecel,Ecel” programasında GRT kanalında gelän serbest günnerindä.
Avtor: L.Novak, operator: V.Kıssa, montaj: İ.Rezuneţ