Bu sabaa Moldovanın çoyu dolaylarında kaar yamurlan geçti. Bununnan baalı şoferlar arabaları haydarkan taa dikat lääzım olsunar, prost havada yavaş gezsinär. Hazır mı avtonomiyanın yol kurumnarı kış zamanın diişik havalarına bizim korespondentımız Lüdmila Novak aaraştırdı.
Bu sabaa çoyu yaşayannarı kaarcaaz sevindirdi. O makar ki tez eridi, ama etiştirdi kefi insana kaldırmaa. Elbetki kaar diil sade sevinmelik getirer, ama kimi problemaları yollarda. Bakmayarak buna «Друмурь-Комрат» yol kurumu vakıtça hepsi lääzımnı işleri geçirdi baalı diişik havaylan. Angı işlär geçirildilär, kurumun öndercisi Nikolay Tatar haberledi: «Komrat dolayında M3 yolunu, Komrat-Kantemir R35 yollarına tuz koyuldu. Çadırda yolun bir payına, Kongazda,Baurçuda. 4 maasuz tehnika tuzun daatması için kullanıldı, 3 maşina insannan hem 2 pogruzçik».
Nicä nışannadı kurumun öndercisi, onnar kış vakıdı gecä- gündüz çalışȇrlar. Büün dä saat 4 sabaylen kontrol edilärdi, nesoy hava diişer hem nekadar kaar yayȇr. Saat 7-dän başlanıldı kendi işlär. Reagent materialları büünkü gün etişer, neyi yok nasıl tehnika için sölemää.
«Reagentların tarafından biz 100 proţendä hazırız, sayıya görä 1800 ton tuz getirildi hem 3000 ton reagent tuzlan karışık. Nicä gösterer bıldırkı yıllar, bizim tehnikamız etişmeer, onuştan başkasından arendaya alȇrız»,- nışannadı Tatar.
Merkez poliţiya inspektoratı şoferlara nasaat eder lääzımnı distanţiya maşinaların aralarında tutsunar. Yayan gezän insannar da yolu geçärkän dikkatlı olsunar. Zorluklan karşı geldiynän 112 numaraya yardım için telefonu açsınar.
Avtor: L.Novak,operator: V.Kısa, montaj: A.Gerçu