Mayın beşindä Gagauz Erinin okullarında sıradakı patriotizma lineykaları geçirildilär. Bu sıra bu olay — enseyiş gününä baalıydı. Tema — Yıllar boyunca — saygıylan hem hodulluklan. Üürenicilär birliktä üüredicilerinnän hatırlan askerleri andılar, ani gelecek zamannarda evlad boyları uslulukta hem raatlıkta yaşasınnar deyni güreştilär, can verdilär. Patriotizma lineykalarında Bakannık komiteti azaları da pay aldılar.
Patriotizma lineykaları hepsi okullarda gimnalardan başladılar. Üürenicilär Moldova hem Gagauz Yeri gimnalarını çaldılar. Nedän sora cenk temasına adalı peetlär hem türkülär öttülär. Butakım üürenicilär kendi şükürlü olmalarını açıkladılar.
«Mayın dokuzu — kahramannık hem girginik simvolu»,- urguladı D.Kara Çoban adına liţeyi başı Mariya Angelova.
D.Kara Çoban adına liţeyindä geçirilän lineykada M.Maruneviç adına Bilim-Aaraştırmak merkezi başı işini götürän İ.Konstantinova pay aldı. Kendi danışmasında o söledi, ki herbirin borcu — cenk için aklında tutmaa hem dä saygıylan askerleri anmaa.
«Çok insan kaybettik. Onnar geri dönmedilär. Ama önemni, ki biz hiç bir zaman unutmayalım o günneri. Açan biz onnar için bilecez, lafedecez — onnar bizimnän birliktä yaşayacȇklar»,- dedi İrina Konstantinova.
D.Karacoban adına liţeyin üürenicileri söledilär, ani havezlän patriotizma lineykasında pay alȇrlar.
«Hatırlan hepsi veterannarı anȇrız».
«Aklımızda tutalım lääzım. Yaratmalarmızda da bu cenk için lääzım annadalım».
Patriotizma lineykalarını okullarda geçirmää deyni iniţiativaylan Üüretim bakannıı çıktı. Hep ölä bakannık üüretim kurumnarına lääzımnı sţenariyaları verer. Sıradakı lineykalar mayın 12-dä hem 19-da geçirileceklär.
Moldovanın hem Gagauziyanın en mekalı haberleri GRTnın Telegram kanalında!