Oluş adalı evelki zanaata – yapaayın işlenilmesinä Komradın «Masal» uşak başçasında geçti. Yortunun neeti- uşakları natural hayvan malınnan tanıştırmaa hem göstermää ondan yapılan giimneri, halk el zanaatlarına sevgiyi terbietmää. Nicä bu tanışmak oldu hem master-klas ustalardan gösterildi Svetla Dimitroglo annadȇr.
«Masal» uşak başçanın salonu gagauz halk stilindä donaklıydı: evelki evcääz, dolu sofra, masalarda didilmiş yapaa, yumaklar, örülü giimnär. Oluşun musaafiri Mariya Arnaut iplii işleer. Masa başında gegaylan örer başka bir el ustası, uşak başçanın terbiedicisi Marina Gaydarcı.
«Master-klas geçirdim. Uşakalara gösterdim, nicä yapaadan iplik işleniler»,- dedi Mariya, usta.
«Örmäk – o zor zanaat, ama meraklı. Biz lääzım uşaklarımıza gösterelim halk ustacılıımızı»,- nışannadı terbiedici.
Multilingval üüretiminä görä, üüredicilär oluşu iki dildä götürdülär: gagauz hem devlet.
Üüredicilär uşaklara annatılar, ani evel vakıtta insan rubaları tükennerdän almardılar, ama kendi ellerinnän yapardılar. Bunun için ilktän yapaayı işlärdilär, sora giimneri örärdilär, palaları dokuyardılar hem başka işleri yaradardılar, ne lääzımnı evcimannıkta. Uşaklar üürendilär. Ne o ii, ne için lääzım yapaa hem nekadar karıların bu zanaatta önemli işi. Gagauz dili üüredicisi Lüdmila Barladän oluşun önemliini açıkladı: «Bu bizim istoriyamız, adetlerimiz, geçmişimiz. Halk ustacılıınnan uşaklarımızı tanıştırmaa bizim işimiz».
Yaslanın en büük terbiedenneri yapaadan türlü işleri ellerinä aldılar, nedän onnar yapılı tanıdılar. Uasta Mariya Arnaut uşaklara iileri verip, gösterdi, nicä iplii kıvratmaa. Hepsini bunnarı meraklan siiretti uşak başçanın öndercisi Anna Kroytor: «Oluşun önemlii- halk el işlerinnän tanıştırmak hem onnarı ellerinä alıp zanaatlarımıza diimää. Saa olsun ustalarımız, ani uşaklarımızı doorudan var olan zanaatlan tanıştırdılar».
Küçüklär yaapayı, onun işlemesini gördülär, nicä ipliktän giimnär olȇrlar insanın elindä duydular. Böleliklän evlad boyun oldu kolaylıı halk yaradıcılıına sevgiyi edinmää. Yortuya terbiedennär dä derindän hazırlanmışlar. Gagauz hem moldovan halkların türkülerini çaldırdılar, oyunnarını gösterdilär.
