Bu ilkyazın kuraklıı hem ayazları kötü belli ettilär kendilerini güzlüklerdä hem meyva başçalarında Komrat hem Valkaneş dolaylarında nışannȇȇrlar agrariyalar. GRT korespondenti Zinaida Kanţır bulundu İvan Mardarin kırlarında, neredä kuruyȇr raps hem boodaylar.
İvan Mardarin meralarında durum pek kötü, çünkü ekin başladı urmaa başaa, da olmayacek ne toplamaa, söleer çiftçi. Erdä nemnik hiç yok, yaasa da yaamurlar, onnara bişey şindän sora yardım etmeyecek, söleer çiftçi. Nicä çıkmaa bu durumdan o bilmeer, çünkü durum dört yıl sürter.
«Büünkü günä durum kırlarda pek kötü , bizdä burada Komratta 320 ektar ekin, erken ekildi, onnar ilk zararlandılar. Bitti nemnik toprakta, yok neylän büümnär beslensinnär. O şindän kolverer başak, lääzım boya gitsin hem başakta olsun. Ama o kuruyȇr, burada ekin olmayacek, neylän da sän onu beslämärsän. Baktık hepsi tehnologiyaları»,- İvan Mardar söledi.
Bölä durum hardalda da, bu yıl bereket olacek pek az, bakmadaan ona, ani hepsi lääzımnı operaţiyaları geçirdik, nışannȇȇr İvan Mardar. 215 ektar raps — bu en büük pay, angısı ekildi kurumda.
«Bölä gidärsä, bereket az olacek, bizdä taa yok yaamur, doz dolay yaadı, bizdä sade damnadı. Erlem bizdä yaayȇr yaamur, bu iki- üç damna. Geçän yıl yannaşık merada ekini senaja biçtik. Şindi orada hardal ekili , o da büümeer. Çiçeklär lääzım boya gitsinnär, ama yok su da durgundu»,- sayȇr çiftçi.
Nicä urguladı Gagauziya agrar bakanı Sergey İbrişim kuraklık belli olȇr Valkaneş hem Komrat dolaylarında, hem hep ölä Taraklıda da.
«İsteerim sölemää, diil hererdä bölä durum, örnek gibi Çadır dolayında yaadı bir aylık norma, orada durum biraz taa ii. Bölä durum bizim üülen tarafında»,- urguladı Sergey İbrişim.
Agrariy İvan Mardar hep ölä söleer, ani ayazlar, angıları Paskelleyä karşı oldular, belli edildilär erik bereketindä.
«Durumu meyva başçasında beklärdik ii , kış geçti ii, biz ilkyazın kırktık fidannarı, nicä lääzım, açtılar fidannar, biz serptik üç keret, ki korumaa çiçekleri. Açti fidannar ii , meyvalar baalandılar. Da bir gecedä dondular. Açan ertesi günü geldik, yok bereket, diyersin dala da silkiner»,- çizgiledi İvan Mardar.
Kuraklıın hem ayazların beterinä agrariyalar barabar agrar bakanıınnan isteerlär buluşmaa agrar ministerliinnän, ki çözmää bu durumu.
Moldovanın hem Gagauziyanın en mekalı haberleri GRTnın Telegram kanalında!