Güz hem kış zamannarında insan taa sık suuklȇȇr. Bu vakıt, açan diişer soluun temperaturası hem nemnii. Bu pek korkunçlu insan için, kimin immuniteti yufka. Hava diişmeklerinä insanın güüdesi üüsek temperaturaylan, burnu akmasınnan,üsürüklän cuvap eder. Nicä kendini korumaa suuklamaklardan annadacek Natalya Andrieş.
Açan dışarda suuk, aaz güneş, ama imektä aazalȇr vitamin, güüdä taa uyfka olȇr da suuklȇȇr. Üsürük, burnu akması, buvaz acıması- suuklamanın nışannarı. En çok insan bu vakıt hastalanȇr. Kendini korumaa deyni lääzım birkaç nasaat hem kural yapmaa, haberledi doktor Üriy Kuşnir. O nışanandı, ani immuniteti kaaviletmää lääzım.
«Bunun için lääızm taa çok meyva hem zarzavat imää, eterli su içmää, saat onadan avşamnen yatmaa da 8-9 saat uymaa, hergün güneşä çıkmaa yazın da, kışın da, ki D vitamini kabletmää, başka malları da imää, ki imuniteti kaaviletmää»,- dedi doktor.
Eer insan suukladıysaydı, yada gripaylan ulaştıysaydı, lääzım doktora danışmaa, lääzmnı ilaçlamayı kabletmää deyni, nışannadı doktor.
«Elbetki, ne doktor söleer, yapmaa hem da baalıntıyı onunnan tutmaa. Sizdä evdä lääzım olsun paraţetamol, ibuprofenI vitamin C ţinklan. Kalanı, ne lääzım, doktor yazacek»,- söledi doktor.
Profilaktika- en ii kolaylık suuklamamaa. Avtonomiya yaşayannarı nışannȇȇrlar, ani kullanȇȇrlar halk kolaylıklarını, ki suukalmakları ilaçlamaa.
«Hepsi halk kolyalıklarını kullanȇrım: bal, ceviz, limon, hepsini. Siirek aptekaya giderim. İmunitet islää».
« Siirek hastalanȇrım, ama doktorlara danışȇrım. Savaşȇrım naşey sä sıcak içmää buvaz için».
«Bakarak, nesoy hastalık. Eer diilsäydi zor, ozaman evdä ilaçlanȇrım. Çay limonnan, bal, tatlı. Ama eer suuklamak zor, ozaman ilaçlan savaşȇrım ilaçlanmaa».
«İlk birkaç gün kendim ilaçlanȇrım, çay limonnan içeerim. Ama er bişey yardım etmärsäydi ozaman bolniţaya giderim».
«Evdä ilaçlanmȇȇrım, doktora giderim».
«Danışȇrız doktora. Bakȇrım uşaan halına. Eer buvazı biraz acarsaydı, ozaman evdä ilaçlȇȇrız. İmbir, limon, bal kullanȇrız. Ama eer temperatura varsaydı, ozaman mediklerä gideriz».
«Bizi analar- bobalar halk metodlarlan ilaçlardılar, biz dä bunu yapȇrız. Ama eer birbişey zor geçer, ozaman doktorlara danışȇrız».
Mediklär nışannnȇȇrlar, ani diil lääızm unutmaa her yıl gripadan vakţinaţiya için. Gripa — o suuklamak, ama o taa zor geçer hem türlü zorluklara var nasıl getirsin.