MD liţeylerin hem gimnaziyaların başarannarına deyni denemäk testlemesi başladı. O çiçek ayın 4-nädän sürtecek. Mart ayın 25-dä 9-cu klaslar başaranarı denemäk testini istoriya predmetindä yazdılar. Bizim televizion grupamız bulundu Komrat kasabası liţeylerin birisindä hem annadı bu yılkı eniliklär için.
Gagauziyanın okullarında 9-cu klasları bu yıl başarȇrlar 1530 üürenici. 46-sı onnardan Komrat Dm.Mavrodi adına liţeyindä üürenerlär. Bu yıl gimnaziya uurunu başarannarını ekzamennerdä kimi diişmeklär bekleerlär, nışannadı Dm.Mavrodi adına liţeyi başı Maksim Bolgar: «Biz bileriz, ani devlet uurunda üüretmäk ministerlii hazırladı gözledicileri, angıları herbir okula geleceklär hem 9-cu klaslarda ekzamenneri geçirilmesi proţesini gözledeceklär. Üüredicilär okullarda ekzamen günündä olmayaceklar, sade kuruluşun başı karşılayacek bu gözledicileri hem klaslara onnarı geçirecek. Bu volontörlar hem gözledeceklär, hem ministerlii temsil edeceklär. Bu gözledicilär yazılı işlerä maasuz kadları koyaceklar hem Kişinöva tek kontrol merkezinä götüreceklär».
9-cu klasları başarannara deyni eksamenneri üürenmäk kuruluşlarında geçeceklär. Üürenicilär gelerlär ekzamenä sade kimniklän hem lääzımnı yazallarlan hem kalemnän.
«Videokameraları hem demir aaramak tertipleri olmayaceklar. Uşaklar sade pasportlan , yazallan hem kalemnän ekzamenä girerlär. Elbetki yannarında ne telefon, he kulaklık, ne dä kol saadı diil lääzım olsun. Ekzamennerdä bulunan volontörlar bunnarı hepsini gözledeceklär»,- nışannadı Dm.Mavrodi adına liţeyi başı Maksim Bolgar.
Bu yıl 9-cu klasları başarannara ekzamenneri vermäk için birkaç denemäk verilecek. Genel sessiyadan kaarä, taa iki kolaylık verilecek, eer ama üürenicilär bu sıra da ekzamenneri verämärsäydilär, onnar atestatsız zanaat okullarına üürenmää yakışacek gitsinnär, nışannadı Maksim Bolgar: «Uşaklar, angıları verämeyeceklär ekzamenneri, onnara deyni taa bir eni kolaylık verilecek. Onnar zanaat okullarına üürenmää yakışaceklar gitsinnär. Ama onnara lääzım olacek dokument, angısı gösterer, ani onnar 9 yıl okulda üürendilär hem notaları hepsi predmetlerdä var».
9-cu klasları başarannara deyni ekzamennär kirez ayın 2-dän 12-nädän geçeceklär. Gagauziyada onnara bir buçuk bin üürenicidän zeedä katılacek.
Avtor: A. Terzi, operator: G.Stavilov, montaj: A.Gerçu
Moldovanın hem Gagauziyanın en mekalı haberleri GRTnın Telegram kanalında!