«GRT» Cümnä Kompaniyasında var listä, angısında belli, nezaman Gagauziya deputatları var nicä pay alsınnar GRT Cümnä kompaniyasının programalarında.
Gagauziya Halk Topluşun deputatları diil bir sıra haberledilär, ani onnarı teklif etmeerlär katılsınnar deyni GRT programalarında. Ama redaktorlar söleerlär başka tülü: tekliflär yollandırılȇrlar, ama deputatların çoyu istämeerlär katılmaa yada cuvap etmeerlär telefonnara. Açıklamaa deyni durumu kompaniyanın işi taa açık olsun deyni , GRT işlettirdi grafii GHT deputatların pay almalası için televizion programalarında, haberledi “GRT” CK Radio baş redaktoru Galina Maresyeva: «GHT hepsi deputatları interaktiv «Диалог в студии» programasında pay alsınnar var nasıl, o her gün cannı yayında saat 14:00 çekeder, cannı yayında gider programa hem gagauz radiosunda, hem da televizionunda, hem da soţial baalantılarında , feysbukta hem da bizim youtube kanalında. Biz kurduk grafii, avtomiyanın deputatları için, ki bu programada pay alsınnar. Deputatlar öncä haberlendilär bunun için, neçinki kompaniya ofiţial kiyatlan danıştı GHT önderciliinä. Programa, angısında lääzım pay alsınnar deputatlar, lääzım çıksın ȇfira herbir pazertesi günü. Da biz kendi tarafımızdan öncä, perşembä yada cuma günü açȇrız telefon o deputata, angısı lääzım pay alsın ȇfirdä, aklısına getirmää deyni, ani plana koyulu programa onun katılmasınnan».
Grafik çeketti kendi işini fevralin 10 — da. O kuruldu alfavitä görä.Büünkü günä çaarılmış 6 deputat, saade bir geldi pay almaa programada. Ama GHT oturuşlarında deputatlar söleerlär, ani onnarı çaarmȇȇrlar katılsınanr «GRT» CK programalarında. Bölä bir danışmak Baba Marta ayın 14 — dä kanondakı bölümün oturuşunda yaptı İvan Dimitroglo: «Televiziona bän şindän sora yarım yıl düşämeerim. Orayı halezdän yok nasıl düşmää».
Da te burada İvan Dimitroglo doorusunu sölämeer, çizgiler «GRT» CK Radio baş redaktoru Galina Maresyeva: «Örnek gibi, Dimitroglo İvana isteerim nışannamaa, ani maasuz bän telefon açtım, da teklif ettim «Диалог в студии» programasına, angısı çıkȇr televizyonda da, o ilktan kayıl oldu, ani mutlaka gelecek programaya. Ama ȇfir günündä , bir saat kalınca programayadan, açan bän taa bir sıra telefon açtım, aklına getirip , o söledi, ani gelämeyecek. Ne getirdi stres durumuna redakţiyada, açan jurnalistlär, redaktorlar hem tehnik uzmannarı bulunȇrlar zor durumda ȇfir vakıdın problemasınnan, neçinki programa kurulȇr bu müsafirin dolayında. Da bizä bir saat kalınca lääzım doldurmaa ȇfirı, da elbetki bu iş belli olȇr kontentin kalitesindä. Barabar bununnan, bu söleer deputatın cuvaplıı için da».
Grafik var nasıl nokta koysundartışmaklarda, da halezdän göstermää, kim hazır açık konuşmaya. Hep bölä grafik yapıldı Bakanıık komitetin hem da Gagauziya yaşamak erlerin primarları için dä.
Avtor: P. Barbova, E. Manita, operator: V. Kıssda, montaj: A. Gerçu
Moldovanın hem Gagauziyanın en mekalı haberleri GRTnın Telegram kanalında!