Aprelin 30-da Gagauziyada geçti «Genel Diktant Gagauz Dilindä», angısı adalı Ana dilim yortusuna. Akţiya geçti Komratta, Kongazda, Valkaneşttä, Kıpçakta hem Çadırda. Diktant saat onda sabaaylen çeketti da topladı 500-dän zeedä kişi, angıların aralarında üürenicilär, kuvet organnarın temsilcileri.
Gagauz dilindä diktan yazılması akţiyası birleştirdi üürenicileri, üüredicileri, hem kuvet organnarın temsilcileri, hepsini kim sever hem isteer korumaa gagauz kulturasını hem ilerletmää ana dilini. Nicä nışanandı Gagauziyanın üüretim bakannıın başı Nataliya Kristeva akţiyanın neeti- gagauz dilin ilerlemesi. O urguladı, ani bölä olaylar önemni rolü oynȇȇrlar halkın dil hem kultura korumasında hem ilerlemesindä.
«Bizdä 500 kişidän zeedä diktant yazdı. O üürenicilär, studentlär, üüredicilär, Bakannık Komitetin hem GHT azaları. Bu örnek bizim uşaklar için. Bän pek sevinerim, ani olay üüsek uurda geçti»,- urguladı üüretim bakanı Nataliya Kristeva.
Gagauz dilindä diktantı Komratta yazdılar Stepan Kuroglu adına gimnaziyasında. Pay alıcılarını karşılardılar donadılmış şişirigalarlan aul içindä, onnara verdilär kepkaları hem maykaları gagauz bayraan resiminnän. Olayın pay alannarın laflarına görä diktant verer kolaylık işitmää ana dilini.
«Bän diil ilk keret katılȇrım bu akţiyaya. Bana görä diildi zor. Tekst kolaydı. Bän sayȇrım, ani bu akţiyalar yardım ederlär bizä unutmamaa ana dilimizi».
«Bu akţiya pek önemni bizim ana dilimizä. Biz kulturamıza taa dikkat olalım deyni».
«Benim bakışıma görä bu akţiyalar çok önemni üürenicilerä».
«Bän katılȇrım bu akţiyaya artık dördüncü yıl. Bän sayȇrım, ani bölä akţiyalar mutlaka pek önemni bizä deyni ilerletmää bizim gagauz dilimizi. Bana kalsa bu oluş verer büük motivaţiya üürenicilerä üürenmää kendi gagauz dilini hem paylaşmaa onun önemniylän biri- birinnän. Bän isteerim şükür etmää hepsi çalışannarı kim pay aldı onun kurulmasında hem şükür etmää, ki onnar bütün kuvedini koyȇrlar deyni biz bilelim gagauz dilini».
Genel Diktant Gagauz Dilindä akţiyası oldu bir yortu gibi, angısı getirdi herbirin aklısına, ani dil – o halkın canı da onun koruması çekeder lafa sevgidän, urguladı üüretim bakannıın baş uzmanı Mariya Uzun: «Herkezi büün burada pay aldı diil, ani göstermäk için, ama severäk gözäl gagauz dilini. İnanȇrım, ani herkezi, kim büün buradaydı, bir gözäl duyguylan gitti evä da gelän yıla taa da çok pay alanımız olacek, çünkü bizim dilimiz — o bizim ana dilimiz, onda lääzm lafetmää, onu lääzım korumaa hem ötä dooru da ilerletmää».
Başarlandı diktant şişirigaların salvermesinnän gökä. Başka üüretmäk kurumnarda da neredä genel diktant geçti, hep ölä yortulu atmosfera vardı.
Moldovanın hem Gagauziyanın en mekalı haberleri GRTnın Telegram kanalında!