Kişinöv kasabasında, Kriuleni, Yaloveni hem Strȇşeni dolaylarında genç insannar aktiv seçimnerä katıldılar. Bu dolaylarda 40% genç insan 18 — 25 yaşında seçimnerä çıktılar. Ama Briçeni, Ştefan Vodȇ hem Okniţa dolaylarında pek az genç insan seçimnerä çıktı. Merkez Seçim komisiyası haberledi, ani 18 yaşından 25 yaşınadan seçicilerin sayısı 126 287 kişi kurdu. Bu bütün seçicilerin sayısından 8,08 % kurȇr.
Geçän referendum hem Prezident seçimneri önemni devletin genç insannarı için, angıları aktiv pay aldılar seçimnerdä, gösterip kendi cümnä bakışını, nışannadılar «GRT» kanalın «Диалог в студии» programasının pay alannarı.Moldova MSK informaţiyasına görä, seçimnerdä en aktiv 18 yaşından -25 yaşınadan gençlär pay aldılar. Onnarın sayısı 8,08% proţent, seçicilerin bütün sayısından. Gagauziyada bu sayı taa aaz-6,83%. Programanın pay alannarın düşünmeklerinä görä Gagauziyada bu sayı taa iisik, neçin ki çok genç insan aşırıda bulunȇr. Bu ilk sebep. İkinci,sayȇr Andrey Şeveli, ani seçim proţesi meraklandırmadı gençleri.
«Prezident görevinä çoyu kandidatlar kendi programalarında bir da adım gençlerä deyni yazmadılar. Onnar gençleri meraklandırmadılar. Bu üzerä gençlär sandılar, neçin seçimnerä çıkmaa, ne için seslerimizi vermää, erliim kimsey bizim için düşünmeer»,-dedi Andrey .
Gençlerin liderleri urguladılar, nekadar önemniydi referendumda pay almaa, neçinki yaşayannarın sesindän baalı devletin gelecää.
«Biz Moldova devletin yaşayannarı, biz lääzım kendi milletimizlän hodullanalım. Bunu gagauzlar için dä var nicä söleyelim. Moldovan milleti — o diil sade bulgarlar, moldovannar, ruslar, angıları burada yaşȇȇrlar. Bu bütün Moldova devletin milleti»,— annattı İvan Panä.
Gençlerin pay alması referendumda gösterdi, ani genç insannar diil sade devletin politika durumunda hazır pay alsınnar, ama onnardan var nasıl çekilsin önemni kararlar da.