Gagauziya başkanın zından işinnän baalı dava oturuşu geçti yanvarin 23-dä. Ama bitki karar genä kabledilmedi. Dava oturuşunu yanvarin 28-zinä geçirdilär.
Dava oturuşunda, neredä bakıldı kanona karşı «Şor» partiyasının finanslamasınnan baalı iş, angısında Evgeniya Guţulu kabaatlı bulȇrlar 4 tomnuk iş seslendi. Ama bir da erdä başakanın soyadı işidilmedi hem da yazılmadı. Bu taa bir keret gösterer, ani biz diiliz kabaatlı, urguladı başkan Evgeniya Guţul: «Bir erdä dä yok. İlk etapta açan marturları sesledilär. Ne benim ne da Popan Svetlananın kabaatı diil belli. Şindi dä bu materiallarlan hep ölä. Herbir etap gözlerindä daalȇr. Büün dä bulunarak dava oturuşunda taa bir keret gördük hem umutlanȇrız, ani bu işi teezlä kapacȇklar».
Bu zından iş politika harakterini taşıyȇȇr, da onu lääzım durgutmaa, ekledi Başkan: «Bän kanonnara görä yaşȇȇrım. Hiç bir dä keret bozmadım ne zından, ne dä administrativ kanonannarı. Da ilk dava oturuşun önündä pek duygulanardım, neçin ki bölä benimnän ilk keret oldu. Da bendä başka bakış vardı dava sistemasına. Ama şindi her keret annȇȇrım, ani senin üstünä var nasıl zından işi açsınnar bakmayarak ona, ani sän onnara hiç katılmadın. 54 tom da birerdä yok ne Guţul, ne dä Popan adı».
Dava yapısının yanında avtonomiya başını karşıladılar onu pay tuttannar, angılar nışannadılar, ani herzaman tutturaceklar Gagauziya başkanını. Onnarın laflarına görä, dava oturuşlar, angıları bir yıl sürterlar vermerlär bvaşkan işlesin nicä lääzım.
«Lääzım dooruluk olsun, onsuz yok nicä. Umutlanȇrız, ani enesyecez. Umut bitki öler».
«Onnar pensionerlara yardım ederlär, kolaylıksız insannara, çok uşaklı aylelerä. Ama bunun erinä o vakıt sudlarda harcȇȇr».
« Onnar pensionerları tutturȇrlar, kendi halkına yardım ederlär. O herzaman insan için. Bölä devletin başı olsun lääzım. Kendi insanına yardım etsin».
Gagauziya başkanın zından işinnän baalı sıradakı dava oturuşu geçecek yanvarin 28-dä.
