Gavril Gaydarjı adına liţeyi 35 yaşını tamannadı o vakıttan, nasıl kuruldu.
Gavriil Gaydarjı adına liţeyı 1989 yılda kuruldu, da o zamandan oldu önemli üüretmäk merkezi bizim regionumuzda, çizgiledi liţeyin öndercisi Olga Kara.
«Biz büün nışannȇȇrız diil saade sıradakı yıldönümünü. Biz nışannȇȇrız 35 başarılı yılı. Bizim liţey kuruldu 1989 – cu yılda, açan açıktı 9 – 10 – cu klaslar. Him – bio, fizmat, mat – info, istoriya, gumanitar hem da iki birleşik klas. Onnar başladılar çalışmaa 1991 – ci yılda. Her yıl üürenicilerin sayıları büüyerlär»,- nışannadı Olga.
Başarannarın çoyu giderlär üürenmää anılmış üüsek okullara da kazanȇrlar islä başarları türlü sferalarda, nışanandı liţey öndercisi Olga Kara.
«Bizim başarannar oldular doktor, injener, üüredici, politik,alış – veriş adamnarı, resimci, ama en önemli, çıkıp insannarın arasına, onnar insan kaldılar. Biz hodullanȇrız onnarın herbirinnän, şükür edip onnarın çalışmaları için»,- sayȇr liţeyin öndercisi.
Liţeyın yıldönümü için üüretmäk kurumunda geçtilär yortulu toplantılar, angıları barabar, nicä üürenicilärlän ölä da üüredicilärlän hazırlandılar. Programaya girdi yortulu sözlär, sergilär, angılarını yaptılar üürenicilär, konţertlär hem da baaşışlamaklar. Hepsi bu yılların içindä liţey kalȇr en ii üürenmäk kurumu, angısı anılmış kendi başaranarınnan, çizgiledi Gagauziya Üüretmäk bakanı Natalya Kristeva:«Ekzamennerdä bakalavr uurunda bitki 4 – 5 yıl – bu üüretmäk kurumunda 100% hepsi ȇkzamenneri vererlär. Hepsini bunun için şükür ederim».
Musaafirlerin aralarında bulundular liţeyin başarannarı da, angıları hep ölä danıştılar şükürlük laflarınnan üürenmäk kurumun üüredicilerinä.
«Pek sevinerim görmää üüredicilerin taa çoyunu, angıları koydular kendi kuvetlerini , ki bizi üüretmää, kim başardı bu üürenmäk kurumunu, onnarın yardımınnan onnar etiştilär büük uurlara yaşamalarında»,- çizgiledi Vadim Çeban, Komrat rayonun öndercisi.
«İsteerim adama liţeyä taa çok bölä becerikli üürenicileri, neçinki biz göreriz, ani Gavriil Gaydarcı adına liţeyi hererdä ilk»,- söledi Stepan Kara, Komrat muniţıpiyasının primarın yardımcısı.
Ana – bobalar da kutladılar liţeyin hepsi üüredicilerini yortuylan.
«Biz isteeriz şükür etmää, çok saol sölemää, ani okadar çok veriler bizim uşaklarımıza, bizim geleceyä, biz umutlanȇrız, ani biz da utandırmayacez sizi».
«Çok saa olsunnar üüredicilär bilgilär için, sizin bitkisiz çalışmanız için, sizin geceleriniz için, neredä oturȇrsınız tefterlärlän».
«Çök şükürlük laflar bütünnä üüredicilik kolektivinä, burada bizim bobamız Grigoriy Aleksandroviç, anamız Nina Nikolaevna».
Üüredicilik kolektivi hep ölä danıştı kutlamaklarlan hepsinä.
«Bu gözäl yortulu gündä isteerim bütünnä üüredicilik kolektivinä adama yaratmak başarlarını, en islää çıkışları ȇkzamennerdä, hep ölä üürenicilerä kaavi saalık, ii başarlar».
«Bän sevinerim bulunmaa bölä toplantıda, açan benim duuma liţeyım 35 yılını tamannȇȇr. Bän bu üürenmäk kurumunda 30 yıl çalıştım, zamandaşta sa bulunȇrım pensiya zamanında. İsteerim adama benim üüredicilerimä, ko kolektivdä her zaman yaradıcılık atmosferası olsun».
«Adȇrım bizim uşaklarımıza, ana – bobalara, üürenicilerä ileri dooru başarlı üürenmäk, kendi liţey için hodulluk, ki siz onu seväsiniz, bizä geläsiniz. Biz pek severiz kendi başarannarımızı».
«Kutlȇȇrım liţeyin 35 – ci yıldönümünnän.Bukadar duygu, bukadar gözäl uşak. Bän adȇrım hepsinä saalık, hepsinä yaradıcılık uurunda başarlar».
«Hepsinä ii başarlar, hem da çok kısmetli uşak, üürenici, onnarı, kim andıracek diil sade bizim liţeyi, ama bizim Gagauziyamızı, Moldovayı da».
«Bu gün bän isteerim kutlayım bizim liţeyimizi bölä yıldönümünnän, gözäl yortuylan.Bu bizim ikinci evimiz, bana deyni bu pek önemli».
«Kutlȇȇrım Gavril Gaydarjı adına liţeyi. Bän bu liţeydä çalışȇrım 11 yıl. Burada bän karşı geldim en islä insannarlan, angıları bu liţeyin çalışannarı, üüredicilär, administraţiya. Bän bukadar yıl üürederim en islä insannarı, talantlı, angıları severlär kendi üürenmäk kurumnarını».
Kendi işindä, liţey ilerleder adetleri, aktiv giriştirer zamandaş üüretmäk metodiklerini, hazırlayıp eni evlat boylarını XXI asirin çarışmalarına.
