Gagauziya M.Maruneviç adına BAM Rusça-Gagauzça, Gagauzça-Rusça mediţina terminneri sözlüün prezentaţiyası geçti.
Olayda Gagauziya mediţina kuruluşlarının uzmannarı hem bilim adamnarı pay aldılar. Rusça-Gagauzça, Gagauzça-Rusça mediţina terminneri sözlüündä 12 bin termin toplu. Hepsi onnardan mediţina uurunda geniştän kullanılȇrlar, nışannadı Gagauziya M.Maruneviç adına BAM başı İrina Konstantinova: «Elbet, bu bizim için bir enilik. Çok gözäl bir çalışma oldu, bizim kollegamız filologiya uurunda doktor Güllü Karanfil aldı bu işi elä, da yaptı pek gözäl bir iş. İsteeriz, ki sizin mediţina sferanızda gagauz dilindä lafetmäk taa kaliteli olsun . Bu ilk çıkış , ama beki siz hem uzmannarınız taa dolduraceklar bu termin sırasını da 5 yıldan sora taa kalın hem eni bir zözlük çıkacek».
Gagauziya Saalık koruması baş bakan yardımcısı Alöna Kozar nışannadı, ani sözlük yardımcı olacek uzmannarın hergünkü işindä , çünkü bolniţalara danışan yaşayannarın çoyu gagauz dilindän kaarä başka dil bilmeerlär.
«Bi̇zdä var pek çok yaşlı i̇nsan, haliz küüyülerdä, neredä sade gagauz dilindä lafederlär. O ilaççılara deyni, angıları bilmeerlär terminneri gagauz dilindä, bu sözlük pek yardım edecek. Pek sevinerim, ani bölä sözlük var, hem herbir doktor yaşayannarlan lafetmektä kullanacek onu»,- Alöna Kozar nışannadı.
Bu sözlük verecek kolaylık mediţina terminnerinin sistemini kurmaa hem professional leksikanın kullanmasını uzmannar ortamında geliştirmää, nışannadı KDB Hronik hastalıkları bölümü öndercisi Elena Rusu: «Bu sözlük doktorların prakti̇k i̇zmeti̇ndä yardımcı olacek. Bundan kaarä bilim-araştırma uurlarını da kaplayacek. Eminim, ani gagauz dili ilerleyecek hem rumın hem ingliz dillerin uurunadan etişecek. Beki biz etişecez o günnerä, açan kendi bilim işlerimizi gagauz dilindä yazacez».
Prezentaţiya süresindä sözlüün avtoru Gullü Karanfil annattı sözlüü kurmak kolaylıkları hem zorlukları için.
«Bana herzaman meraklıydı mediţina terminneri gagauzça, nesoy olaceklar. İki yılın süresindä hazırladım. İşlärkenä bu sözlüklän , bän mediţina uzmanı oldum. Çünkü videoları siirettim annamaa deyni, folklor araştırdım. Türk hem romın dilleri sözlüklerini kullandım»,- nışannadı avtor.
Kıpçak küüyü Aylä doktorları merkezi aylä doktoru İrina Yalama nışannadı, ani mediţina terminneri sözlüün peydalanması Gagauziya mediţina ortamına deyni istoriya olayı gibi oldu.
«Bu haliz istoriya olayı, mediţina uurunda birisi terminnär sözlüü yoktur yaptıı gagauz dilindä. Umutlanȇrım, ani bu sözlük uzmannarlan her gün kullanılan posobiyaların arasına girecek»,- İrina Yalama nışannadı.
Prezentaţiyada pay alannar açıkladılar kendi umudunu, ani sözlüü kullanabileceklär mediţinanın herbir uurunda işleyän uzmannar.
Avtor: A. Terzi, operator: G.Stavilov, montaj: A.Gerçu
Moldovanın hem Gagauziyanın en mekalı haberleri GRTnın Telegram kanalında!