Gagauziya Üüretmäk bakannıı haberledi «Benim Gözäl Gagauziyam» foto yarışmasının çıkışlarını. Bu konkurs adalıydı Gagauz avtomomiyasının kurulmasına. Okul hem uşak başçaların üürenicilerin en ii patretleri 2025 yılın kalendarindä gösterili.
Gagauziya Üüretmäk bakannıı «Benim Gözäl Gagauziyam» foto yarışması için noyabrinin 2024- dä haberledi da teklif etti katılmaa okul hem uşak başçaların üürenicilerini, üüredicileri, terbiedecileri hem anaları-bobaları. Onnarın önundä zor bir iş durardı — kameranın obiektivindän göstermää ana dolayın tabiatını, gagauz halkının kulturasını hem adetlerini, insannarı hem onnarın gündeki yaşamasını.
«Bu yarışmak çok gözäl, çok uşak katıldı. Bu yıl biz istedik yapmaa ölä, ani yarışmada pay alsınnar uşakların anaları-bobaları, däduları hem babuları, çünkü ayledä bölä paalılıklar, nicä sevda ana dilinä, erinä, adetlerinä annaması yoksaydı, bu yaraşmanın faydası olmayacek»,- çizgiledi Natalya Kristeva.
Bu yıl foto yarışmasının kurucuları koydular urguyu aylä paalılıklarına hem adetlerinä.
«Biz pek dikkat olduk o patretlerä, neredä gösterili analar-bobalar, üüredicilär, terbiedicilär. Hepsi patretlär çok gözäl. Herbir yapılmış uşaklan patret özel»,-nışannadı üüretmäk bakanı .
Yarışmaya yolladılar bindän zeedä patret. Gagauziya üüretmäk bakanı Natalia Kristeva nışannadı, ani ayırmaa ensiyicileri halizdän kolay bir iş olmadı, bu iş sürttü birkaç gün.
«Bu yıl birkaç nominațiyamız vardı: Gagauzia — benim Vatanım, Gagauzia süretlerdä, Sıralar hem adetlär, Gagauziyanın eni evlat boyları. Zordu ayırma en iisini, birkaç gün dartıştık, ayırarak patretleri. Bindän zeeda patret kablettik, bu halizdän çok zengin bir material»,- dedi Kristeva. En ii patretlär kalendarin kurulmasına temel oldu. Tipardan çıktı 500 ekzemplär gagauz dilindä. Onnar baaşışlandı Gagauziya okullarına hem uşak başçalarına. Kalendardän kaarä yakın gelecektä neetleniler kurmaa patretlerin bir elektronik toplumu. Enseyecilär, kim pay aldı yarışmakta, kazandılar ödülleri: diplomaları hem para ödülleri.
