Dekabrinin 15-dä Komradın stadionunda dostluk matçı Gagauziya hem Türkiye futbol veterannarın arasında geçti. Oyun Gagauz avtonomiyasının 30-cu yıldönümünä adandı. Futbol matçı 1:0 sayısınnan başarıldı, Türkiye futbolistleri taradılar.
Futbol matçı Türkiye hem Gagauziya futbol veterannarın arasında 1:0 sayısınnan bitti. Ön erä musaafirlär çıktılar. O taa çok dostluk buluşması sportçuların arasında oldu, nekadar yarışma nışannadılar futbolcular. Futbol veterannarı, butakım olaylarda pay alarkana, kendi becermeklerinnän paylaşȇrlar, evlad boylarına da sportu ilerletmää ihlam vererlär.
«Gagauz takımı ii bir oyun oynadı. Gözäl matç oldu. İki tarafı da kutlȇȇrım. Başarları dilerim».
«Bizim avtonomiyaya deyni oyun ii uurda geçti, duygulu. Biz tarayamadık, ama hepsi futbolcular savaştılar üüsek uurda oynamaa. Organizaţiya iidi».
«Gözäl bir matç futbolcularımız yaptılar. Başarların devamını dileerim».
«Gözäl bir matç oldu, sakatlık olmadan. Bizä olan sıcaklıklan karşıladıı için mutlu kaldık. Sizleri severiz».
«Dostluk, djentlmenlik oldu, önemli, ani sakatlık olmadı. Bu hayırlı devamnıı her erdä annadacez».
«Bukadar gözäl kabletmenizi düşünmediydim. Futbol oynamaa geldik, ama taa çok kazandık-dostluu».
Oyun oldu kolaylık gözäl futbolu siiretmää hem taraflar aralarında saygıyı hem hayırlı baalantıları çizgilemää, paylaşȇrlar futbol siiredenneri.
«Gagauz komandası için pay tutȇrız, ama sevineriz, ani Turkiye veterannarı geldilär hem bu oyun bizdä geçer».
«Oyun iki komandanın da arasında ii gider. Türklär belli, ki taa islää oynȇȇrlar, ama bizim oyuncularımızı tutturȇrız».
«Türkiye oyuncuları komandalı oyunu göstererlär. Bizimkilär da islää tarafını koruyȇrlar. Başarları onnara dileeriz».
Butakım buluşmaklar göstererlär, nekadar sport insannarı birleştirer, bakmadaan ne yaşlara, ne da sınırlara. Futbol matçın baş neeti – kardaş halklarında dostluu kaaviletmää hem pozitivli durumu kurmaa. Tükiye musaafirlerini GHT başı Dmitriy Konstantinov karşıladı.
«Mayıl oldum, ani Türkiye bizimnän birliktä Gagauz avtonomiyasının 30-cu yıldönümündä. Türkiye hem Gagauziya öndercileri halkların aralarında köprüyü kurdular. Siz bizimnän birliktäysiniz hepbir»,- Dmitriy Konstantinov, GHT başı, nışannadı.
Çalışmak erindä, Gagauziyada bulunan, Türkiye Cumhuriyeti Komratta Genel Konsulu hem KDU-in üüredicileri matçı özelliklän gözlettilär. Devletin futbol grupunu sevinmeliklän kaşrıladılar. Sonuçlar belli ki sevindirdilär, çizgiledi Komratta TC Genel Konsulu Adnan Hayal.
«Türkiyeden gelän komanda kazandı, sevindik. Oyun Gagauziyanın 30-cu yıldönümünä adanȇr. Matç gözäl geçti. Biz kazandık, kısmetliyiz»,- Türkiye Cumhuriyeti Komratta TC Genel Konsulu Adnan Hayal nışannadı.
Butakım olaylar, kultura hem sport baalantılarını halkaların ararlarında kaavilederlär. Matç gösterdi sport profesionnallıını hem komandaların ararlarında dostluu, söleer Gençlik hem sport bakanı Väçeslav Dragoy: «Yaptık bir gözäl matç. Saa olsun dostlarımız, bizim yortumuzu saydılar.Bizim futbolcularımız gözäl oyunu gösterdilär. İnanȇrız, ani taa geçirecez gözäl matçları».
Futbol matçın pay alanı oldu GHT deputatı Grigoriy Dülger: «Pek gözäl oyun oldu. Hoşlandım. Bizim futbol veterannarımız güçlü oyunu gösterdilär».
Futbol oyunu Türkiye hem Gagauziya veterannarın aralarında halizdän sıcak hem dostlu atmosferada geçti, nışannadı Gagauz futbolcuların treneri Pötr Kristioglo: «Futbolcular gözäl bir oyun gösterdilär. Bizim sportçularımız, angıları avtonomiyanın futbol veterannarı, üsek oyunu gösterdilär».
Bu matç diil sade sport olayı , ama iki kardaş devletin arasında simvolu oldu, söleerlär Türkiye Millet Veterannar Futbol ligası müdürleri.
«Sonuç önemli diil. Bu dostluk, kardaşlık matçı. İki komanda da kaavi. Oyuncular kaliteli. Bu saalıklı atmosferada başkanımızı Evgeniyayı Guţul, HT başını, deputatları, Sport bakanını, kimi da taa sıralamadım, şükür ederim, burada 3 gün gözäl geçti»,- Türkiye masterlär hem veterannar Futbol Federaţiyası başkanı Murat Ülgen çizgiledi.
«Bizi pek islää kablettilär, kendi evimizdä gibi. Matç dostluk uurunda geçti. Sportçular pek ii oynȇȇrlar. Sizi bizdän ayırı görmedik»,- Savaş Buyurman,TMVFL Başkan yardımcısı, söledi.
«Takımınızı umudumuzdan çok ii gördük. Gözäl grupunuz var, gözäl organizaţiya oldu. Bir kerä sizin da futbolcularınızı bizdä göräriz»,- Kenan Gürsu, TC masterlär hem veterannar Futbol Federaţiyası başkanı nışannadı.
«Gagauz grubu kayet ii oynadı, bizim futbolcular da ii oynadılar. Heyecanlı bir matç oldu. İki komandayı da kutlȇȇrım»,- Savaş Göcen, TMVFL Milli Karma tehnik triktöru, sayȇr.
«İki takım da çok ii oynadı. Sizin takım da gözäl oynadı, bizim da gözäl. Karşılıklarınız için çok saa olunuz»,- Ramazan Yıldız, TMVFL Başkan vekili, söledi.
Butakım buluşmaklar birlik ruhunu kaavilederlär, futbol veterannarı da kendi örnäännän göstererlär, ani sport her yaşta yaşamanın önemli erindä bulunȇr. Matçtan sora, pay alannar sıcak anmaklarlan paylaştılar, simvollu baaşışlarlan. Dostluk kubokları komandalar ikisi da kazandılar.
