Gagauziyada başladı serbest güreşmedä çempionat 13 yaşınadan sportçuların arasında. Yaraşmaya geldilär bütün avtonomiyadan genç sportçular. Iki günün süresindä onnar göstereceklär tehnikaları, dayanmakları hen harakteri. Bu turnir taa bir etap milli hem halklararası yaraşmaların hazırlanmasında.
Gagauziya çempionatı serbest güreşmäktä diil sade medali için yaraşma, ama islää bir kolaylık genç sportçulara kendi kuvedini konteol etmää, nışannadı Gagauziya sport hem gençlik bakanı Väçeslav Dragoy: «Bu çempionat ayıracek sportçuları kim Gagauziyayı Respublika çempionatında gösterecek. Umutlanêrız, ani sportçular nicä buun, sabaa da göstereceklär ii başarları. Da sora Respublika uuruna çıkaceklar. Umut ederiz ,ani finala etişeceklär ilk erleri alaceklar da Avtonomiyayı hem Respublikayı Evropa hem Dünnä Çempionatında göstereceklär».
Çempionatın baş daavacısı Ilya Esir nışannadı, ani var çok pay alannar. Onun laflarına görä, bu yaraşmakların baş nieti — diil sade en kaavilerini göstermää, ama uşaklar sevsinnär sportu, da güreşmäk olsun onnarın yaşamasının bir payı.
«Büün pek üüsek başarları biz beklämeeriz. Biz taa pek isteeriz ki uşaklar taa çok sportlan zanaatlansınnar. Ki onnar gezmesinnär sokaklarda da kötülük yapmasınnar. Acan onnarın var zanaatı ,sport zalasına giderlär- o büük fayda onnarın saalıına, hem onnar sevindirerlär anaylan bobayı da. Onnar bizim gelecemiz, biz buna sevineriz»,- Ilya Esir nışannadı.
Genç sportçulara bu çempionat önemni olay. Onnar hazırlandılar birkaç ay, ko göstermää ii başarları, dedi Beşgöz sport okulun trenerı Mihail Molla. O çizgiledi, ani onun sportçuları pek beklrdilär bunu.
«Uşaklar güreşerlär birinci klastan. Onnar da lääzım neredä sa kendilerini göstersinnär, açılsınnar.Bölä çempionatlar vererlär onnara büük stimul. Bir yildan sora onnar taa üüsek uurda pay alaceklar»,- dedi Beşgöz sport okulun trenerı Mihail Molla.
Komrattakı sport liţeyin trenerı Födor Tukan nışannadı, ani onun üürenicileri pek dikkat hazırlandılar yaraşmaya, da o onnara büün ürek verer hem onnarlan bilä dalgalanêr.
«Hepsi çocuklar kendi uurunda hazırlandılar. Beşgöz ,Kongaz, Dezgincä. Car burada trenerlar genç ani işlerlär. Onnar çok cuvaplı da burada belli olacek kim angı uurda bulunêr»,- Födor Tukan nışannadı.
Güreşmeyä çıkınca sportçular biraz dalgalanêrlar, ama kendi kuvedini da duyêrlar. Onnar kendi duygularını açıkladılar hem söledilär nesoy bu yaraşmaya hazırlandılar.
«Bän bütün afta hazırlandım. Sport liţeydä yaptım trenirovka. Burada kablederiz islää bir opıt hem başka çocuklarlan tanışêrız».
«Bän birkaç gün hazırlandım. Var kimsa taa kaavi, kimsa taa yufka. Ama sanêrım ,ani ilk eri alacam. Er ölä olarsaydı bän gidecäm Moldova Çempionatına».
«Bän pek dikkat hazırlandım.iki aftaya yakın, ki çempionata gelmää. Çocuklar kaavi, ama savaşacam ilk eri almaa. Isrerim Olimpiya oyunnarına düşmää da olmaa nica en ii güreşicilär».
«Bän da hazırlandım. Zabunnadım, gecä kaçtım. Büün pek dalgalanêrım hem isteerim ikk eri kazanmaa».
Gagauziya çempionatı serbest güreşmäktä her yıl geçiriler. Burada toplanêar regionun en kaavi sportçuları. Turnirın tarayannarı medali hem gramota kabledeceklär, hem olacek kolaylık göstermää avtonomiyayı Moldova çempionatında, angısı bir aydan sora geçecek.
Moldovanın hem Gagauziyanın en mekalı haberleri GRTnın Telegram kanalında!