Komratta geçti tombarlak masa, angısının süresindä bakıldı soruş, angısı baalı Gagauziyanın ilerlemesinnän.
Tombarlak masanın süresindä bakıldı birkaç soruş, angıları baalı Gagauziya hem devlet önderciliin iş baalantılarınınnan. GHT deputatı Nikolay Dudoglo nışannadı, ani geldi vakıt politika kuvetlerini birleştirmää.
«Bän isteerim, ki dialog büün açık gitsin. Kabaatlı bulmayalım birini, ama yapalım hepsini, ani birleştirelim politikleri. Bitki vakıtlar göreriz, ani Gagauziya parça-parça olȇr, bu işin sebepleri büük. Belli , ani Gaguziya daaldı hem sade ekonomika yoluna geçti, onun için dä büün var, ne iş için lafedelim»,— dedi Dudoglo.
Oturuşun süresindä pay alannar açıkladılar kendi bakışlarını hem cümneyi birleştirmäk tekliflerininnän çıktılar. GHT ȇks-başı Pötr Paşalı teklif etti kurmaa region partiyalarını, angıları Gagauziya politika yaşamasında aktiv pay alsınnar yakışȇrlar.
«GHT deputatların yardımınnan biz lääzım Gagauziya politika partiyaları kanonunu işledelim hem kabledelim. MD kanonnarına görä biz bu işi var nicä yapalım. Kurulmuş partiyalar yakışaceklar pay alsınnar seçimnerdä, nicä Gagauziyada, ölä da devlet uurunda»,- nışannadı Pötr Paşalı.
Gagauziya Ȇks-başkanı Mihail Formuzal Komrat Kışınöv arası ilişkileri için kendi bakışını açıkladı. O çıktı kimi tekliflärlän, angıları, onun bakışına görä, yardım edeceklär eniletmää Parlament hem HT arası iş grupanın işini.
«Benin bakışıma görä, komissiyada bizim tarafımızdan lääzım olsun ölä bir kişi-moldovan, angısı Gagauziya Maasuz Hak Statusunu kabledärkenä, MD önderciliindä bulunardı. O insan lääzım kayıl olsun bizi meraklandıran soruşları Kişinövda ilerletmää»,- Gagauziya Ȇks-başkanı Mihail Formuzal nışannadı.
GHT ȇks-başı Anna Harlamenko nışannadı, ani 30 yılın süresindä ön planda herzaman milli ideya dururdu, hem hepsi proţesleri avtonomiyada ilerledärdi.
«Büünkü gündä nesoy millet ideyamız bizim-gagauz partityasının kurulması . Parlament kvotası-bu ideya da pek gözäl. Sade lääzım yazdıralım , yapalım programmayı, ki insan annasın, ne biz isteeriz, ki biz nesä büük gösterelim. Ki insan görsün, neylän biz gideriz yaşayannara, ne isteeriz yapmaa hem ne kurmaa»,- çizgiledi GHT ȇks-başı Anna Harlamenko.
Buluşmanın süresindä pay alannar seçtilär karar yılın sonunadan taa 2 oturuş geçirmää hem Devlet partiyaların azalarını da burayı teklif etmää.
