Gagauziyanın Gençlik hem sport bakannıın administraţiyası bu gün Kişinövun aȇroportunda Türkiye devletin futbol federaţiyasından veterannarı karşıladılar. Sportçuların viziti, futbol oyunu Gagauziyanın 30-cu yıldönümünä adalı. Matç dekabrinin 15-dä geçecek, Komradın stadionunda, saat 12-dä üülendä. Oyun «GRT» CK cannı yayınnanacek.
Futbol matçı Gagauziyanın hem Türkiyenin futbol veterannarın arasında geçecek. Oyun Gagauziya (Gagauz Eri) avtonomiya statusunun verilmesinä adalı. O geçecek Komradın stadionunda dekabrinin 15-dä saat 12-dä. Türkiyedän sport veterannarını, angıların sayısına 35 kişi girdi, Kişinövun aȇroportunda Gençlik hem sport bakannıın öndercilii karşıladı. Musaafirlerin taa çoyu devletimizä ilk kerä gelerlär.
«Biz Gagauziyanın 30 yıldönümünä geldik. Türkiye devletini temsil ederiz. Hayırlı oyunu bekleeriz hem kaavi baalantıları»,- nışannadı masterlär hem veterannar Türkiye Futbol Federaţiyası başkanı Murat Ülgen.
«Çoyu devletlerdä bulunduk, ama Moldovaya, Gagauziyaya seftä geldik. Gözäl organizaţiyaya umutlanȇrız, çünkü Türkiye hem Gagauziya kardaş devletleri. Türkiyedä matçı izleyeceklär»,- nışannadı Türkiye masterlär hem veterannar Futbol Federaţiyası başkanı Kenan Gürsu.
«Futbol federaţiyamız teklifinizä görä geldi. Bu dostluk oyunu olacek»,- söledi TMVFL Başkan vekili Ramazan Yıldız.
«Bu ilk vizitimiz Topraanıza. Türkiye hem Gagauziya aralarında ilk buluşmak. Gagauziyayı 30-cu yaşınnan kutlȇȇrız»,- çizgiledi TMVFL Başkan yardımcısı Savaş Buyurman.
Futbol matçı Türkiye hem Gagauziya veterannarın- masterların aralarında yardım edecek halkların aralarında dostluk hem kultura baalantılarını kurmaa, söledi Gençlik hem sport bakanı Väçeslav Dragoy.
«Biz Gagauziya futbool veterannarını topladık, angıları regionun futboluna zaamet ettilär. Komandayı Kristioglo Pötr hazırlȇȇr. Oyun meraklı olacek»,- nışannadı Gagauziya Gençlik hem sport bakanı Väçeslav Dragoy.
«Bän düşünerim, ani bu gözäl bir başlantı hem diil sade futbolumuza deyni, ama kalan sport uurlarına deyni dä»,- çizgiledi Gençlik hem sport bakannıın sport bölümün başı Pötr Kuru.
Matçın kurucuları belli edelär, ani sport oyunu insannarı birleştirecek hem birliktä çalışmanın baalantılarını ilerledecek.
Avtorlar: S. Dimitroglo L. Novak, operator: V. Kıssa,montaj: M.Kazaku