D. Kara Çoban adına Milli Gagauz tarih hem etnografiya muzeyindä geçti buluşmak Gagauziya anılmış filologlarınınnan, insannarlan, angıları kuvet kuymuşlar gagauz kulturasının, istoriyasının hem lingvistikasının aaraştırması uuruna.
Gagauziya Bilim adamnarınınnan buluşmaklar D.Kara Çoban adına Milli gagauz tarih hem etnografiya muzeyin iş planına koyulȇrlar. Bölä buluşmaklar vererlär kolaylık yaşayannara hem üürenicilerä tanışmaa bu insannarın katkısınınnan, gagauz kulturasının, istoriyasının hem lingvistikasının aaraştırmasına hem ilerlemesinä, nışannadı D.Kara Çoban adına Milli gagauz tarih hem ȇtnografiya muzeyin uzmanı Mariya Kösä: «Büünkü gündä ölä bir durum var, ani uşaklar taa çoyu baalı telefonnarda, kompüterlerdä. Onuştan biz sayȇrız bir büük iş gibi getirmää onnarı okullardan , da onnar taa ii bilsinnär bizim kendi geroylarımızı, ama diil başka insannar için. Bilsinnär bizim istorikleri, bizim yazıcıları. Biz göreriz, ani uşaklara olȇr büük fayda».
Buluşmakta pay alan üürenicilär aktiv katıldılar musaafirlärlän lafetmeyä, nışannadı M.Kösä adına gimnaziyası gagauz dili üüredicisi Mariya Kapaklı:«Sanȇrım, ani uşaklara verän bunnarı taa temellendirecez, taa gösterecez onun özelliini, lääzımnıını, ne var bu insannarın yaşamasında. Okadaradan meraklı, okadaradan diri hem dolu yaşamaklan, istoriyaylan. Sanȇrım, ani nekadar taa sıkça hem zeedä bu buluşmaklar olaceklar, okadar taa çok faydası uşaklarımızda görünecek».
Filologiya bilgileri doktoru, KDU doţenti, M.Maruneviç adına BAM uzmanı Diana Nikoglo annattı, nesoy o seftä Gagauzların material kulturası temasınınnan tanıştı: «Bulunarak Mariya Maruneviçtä evdä, bän seftä tanıştım onun kiyadınnan üülen Besarabiyadakı gagauzların evleri için. Bän başladım onu okumaa hem pek meraklandım bu aaraştırmaklan. Sora bän tanıştım L.A.Pokrovskayaylan da yavaş-yavaş başladım daalmaa bu meraklı temalara».
Filologiya bilgileri doktoru, aaraştırıcı, M.Maruneviç adına BAM uzmanı Vitaliy Sırf annattı literatura tekstlerini aaraştırmak özelliklerininnän hem nışannadı kendi üüredicilerinin katkısını onu aaraştırmak yolunda. Vitaliy Sırf doktorluk disertaţiyasının 2001-ci yılında «Gagauz büülü masalı» temasına görä korudu.
«Bän savaştım, ki bu kiyat olsun yannışlıksız hem burada var ölä süjetlär, personajlar, ani bizim büülü masallar, angılarını annadȇrlar bizim babular hem dädular, onnar meraklı diil sade uşaklara, ama büklerä dä»,- annattı Sırf.
Filologiya bilgileri doktoru, Moldova devlet universitetin doţenti Evdokiya Soroçanu annattı uşaklara, nesoy onun eceli baalandı Beşalma küüyünnän.
«Sizin küüyünüz- çeketmelerin çeketmesi. Bakarsak küüyünüzün istoriyasına, göreriz, ani Moşkov ilk kultura materiallarını burada toplamış. Bän studentkenä geldim Beşalmaya material toplamaa, hem beni kaarşıladı muzeyin başı D.Kara Çoban. Bän burada buldum kiyadı, angısını bän Bulgaristanda bulamaardım»,- söledi Soroçanu.
Üürenicilär aktiv pay aldılar diskussiyalarda. “Sedef” folklor kolektivin azaları evelki türkülerini çaldılar. Muzeyın bugünkü musaafirlerinä verildilär gramotalar hem baaşışlar.
Avtor: A. Terzi, operator: A. Glekov, montaj: İ.Rezuneţ.