Dekabrinin 19 Komratta intelektual oyunu geçti. Olay Gagauziyanın 30-cu yıldönümünä adandı. Gagauziyanın üüretmäk kurumnarından 36 komanda pay aldı. Yortulu oyunda «Shawerma» komandası Kazayak klüüyün liţeyindän birinci oldu. İkinci erä «Bilgiçlär» Avdarmanın liţeyindän çıktılar. “Siţiliya” komandası Çadır-Lunganın Moşkov adına liţeyindän -3-cü oldular.
«Gagauziya-30» intelektual oyunun pay alannarı ȇrudiţiyayı, fikirin hızlı düşünmesini, derin soruşlara cuvapları denedi. Onnar avtonomiyanın, yaşamak erlerin istoriyasınnan, önemli olaylarınnan baalıydılar. Oyun pay alannarın bilgilerini denedi, verdi kolaylıı üürenicilerä sevgiyi Vatanına açıklamaa, paylaştı intelektual oyunnarın komandaların pay alannarınnan.
«İntelektual oyunnarı meraklı. Hazırlanarkana kimi enilikleri kendimä deyni açtım. En önemli benim Vatanıma deyni – o Gagauziyanın kuruluş günü».
«Bizim dedelerimiz ana dilimizi, kulturamızı bizä deyni korumuşlar, bizim davamız onu korumaa hem ilerletmää».
«Benim Vatanım – o benim evim, ayläm,yakın insannarım. Hepsi, ne baalı ruh içindelimizliinnän».
«İntelektual oyununa hazırlanarkana, taa bir kerä Gagauziyanın istoriyasını aklımıza getirdik».
OlayıÜüretim bakannıı hazırladı. Kurumun başı Natalya Kristeva belli etti, ani intelektual oyunnarı üürenicilerdä meraklıı çekerlär. Geçirmää onnarı avtonomiyanın kuruluş günü için adet oldu.
«Gagauz avtonomiyasının kuruluş günü için yortulu oyunu geçireriz, nereya regionun gimnaziyalarından hem liţeylerindän üürenicileri teklif ettik. Uşaklar büük havezlän oyunnara katılȇrlar hem başarlı çıkışları vererlär»,- dedi Kristeva.
«İntelektual oyunu – o diil sade yarışmak, ama kolaylık taa bir kerä annamaa, nekadar Gagauziyamız unikal. Bu ii bir kolaylık üürenicileri hem üüredicileri birleştirmää, söledi Gagauziya Başkanı Evgeniya Guţul hem HT başı Dmitriy Konstantinov.
«1994-cü yılda, dekabrinin 23-dä bizim avtonomiyamızın duuma günü. Biz onu lääzım koruyalım, dilimizi, kulturamızı. İnanȇrım, ani universitettän sora avtonomiyamıza döneceez»,- çizgiledi başkan.
«Bu gün sevinerim, ani akıllı uşaklarımızlan birliktäyiz. Uşaklarımız, üüredicilerimiz akıllıysınız. Arifliinizi respublika uurunda gösterersiniz»,- nışannadı spiker.
Tarayıcılar ödüllendilär, hepsi pay alannar simvollu suvenirleri kablettilär.
