«Kongaz ustalıı – 2025» festival sergisi Kongaz küüyündä geçti. Olayda vardı nicä tanışmaa Moldovanın, Gagauziyanın hem Ukrainanın becerikli ustaların el işlerinnän. Festivalin ikinci payın programasını küüyün Kultura evin yaradıcılık kolektivleri hem Gagauziyanın artistleri kurdular.
El işleri: peşkirlär, dorojkalar, dokuma palalar, kırma kilimnär, evelki ev tertipleri, bijuteriya hem çok taa başka incäzanaat işleri Kongazın Kultura evin festivalin sergisindä vardı nicä görmää hem almaa. Küüyün üüretmäk kurumnarı, yaradıcılık kolektivleri hem avtonomiyanın halk ustaları talantlı ustaların yaradıcılık dünnesini gösterdilär.
««Kongaz ustalıı» — o kolaylık muzeyin ȇksponatlarını göstermää. Hepsi onnarı bizim üürenicilerimiz getirdilär. Biz çalışȇrız gagauz dilimizi ilerletmää hem genişletmää. Sergiya odundan işleri getirdik. Odundan len, uşak sallangacı asirdän zeedä korunmuşlar».
«Bu festivaldä herzaman pay alȇrız. İnsannarımıza sevineriz, onnar istoriyamızı aklılarında tutȇrlar».
Kongazın yaşayannarı sergiya havezlän katılȇrlar, el işlerini alȇrlar.
«Gagauziyamı pek severim, ani duuma küüyümdä el ustacılıı festivali geçer pek sevinerim».
Bundan kaarä, 2024-cü yılın aprel ayında Kongazda «Kongaz gergefi», angısının neetiydi evlad boylarımıza dedelerin ustacılıını açıklamaa, söleer Kongaz küüyün Kultura evin başı Matröna Hristeva: «Festival ikinci yıl geçiriler. Bu yıl festivalin sınırları genişlendi. Bu gün var kolaylıımız halk ustaların el işlerini, evelki ev avadannıklarını, evcimannık tertiplerini göstermää».
«Kongaz ustalıı – 2025» ustacılık festivali verer kolaylıı uşaklaa ilerlemää, paylaşȇr GHT deputatı Demyan Karaseni: «Burası küçüklüümü aklıma getirtti. Burada bizim gagauz karıların, ustaların el işleri».
Butakım olaylar gagauz kulturasını, zanaatlarını açıklȇȇrlar, söleer kultura bakanı Marina Semönova: «Sade butakım festivallärlän bizim var kolaylıımız evlad boylarına varlıımızı etiştirmää hem millet kulturamızı ilerletmää».
Geçän yıl aprelin 7-dä Kongazın Kultura evindä «Kongaz gergefi – 2024» el ustacılıı Halklararası festivali geçirildi, neredä pay aldıydı devletin türlü regionnarından ustalar.
Moldovanın hem Gagauziyanın en mekalı haberleri GRTnın Telegram kanalında!