Gagauz halk partiyası. Onun kurulması için haberlendi delegatların syezdında, angısı Komratta geçti.
Gagauz halk partiyası kurulȇr onun için, ki o korusun avtonomiyanın hem halkın haklarını, angıları yaşȇȇrlar onun teritoriyasında, nışannadı partiya kurucuların birisi Nikolay Dudoglo: «Taa islää olacȇk, açan biz kendimizi koruyacȇz, kendimiz çalışacȇz, kendimiz kazanacȇz, ozaman biz ileri gidecez. Biz büün gitmeeriz başka partiyalara karşı. Büün isteeriz Gagauziyayı kaldırmaa, kimseylän çekişmää istämeeriz. İleri dooru koyȇrız bir plan önümüzä, ani beş yılda gagauzları bireri toplamaa. Onun için biz açacez kendi ofislarımızı Moskvada, Tiraspolda, Kişnovda, İstanbulda, Evropada, ki toplamaa hepsi gagauzları bireri. Bunu yaparsaydık, inanȇrım, ani ozaman Gagauziya çok ileri gidecek».
Gagauz halk partiyasının baş neeti- korumaa avtonomiyanın haklarını barabar yaşayannarlan, nışannadı partiya kurucuların birisi İvan Kılçik: «Bu esap için da kurulȇr bu partiya, ki olsun kolaylık korumaa, kaldırmaa bizim haklarımızı hem ilerletmää bizim ekonomikayı, politikayı hem bizim halkımızı».
Gençlerin adından partiya kurulması için söledi İvan İkizli. O nışannadı, ani bu lääzım avtonomiyanın gelecää için.
«Bän sayȇrım, ani büün açtık bu partiyayı da bu pek islää. Neçinki gençleri lääzım burada tutmaa, gençlerä lääzım açmaa eni yol, hem gençlär lääzım işlesin»,- söledi İvan İkizli.
Partiya çoktan lääzımdı kurulsun, amma kolaylık yoktu. İnsan istemesinä görä geldik çıkışa da partiyayı kurdu, urguladı avtonomiya kurulmasında aktivist Nikolay Telpiz: «Sayȇrım, ani bu taa ilk adımnar, taa çeketmesi. İslää, ani Moldova kanonu bizä izin verer da geldi vakıt, ani bizdä kendi partiyamız lääzım olsun. Onun adı da gözäl. Bu olacȇk gagauzların kendi politika toplantısı. Sanȇrım, ani bizim insan bunu kabledecek. İnsan birleşecek da biz gidecez kendi yolumuzlan. Hem da dünnä görecek, ani bizim var kendi partiyamız. Biz lääzım kendilerimizä kendi payımızı, uurumuzu kazanalım. Hem yaşamamızı kuralım kanona görä, angısını 1994-cü yılda kablettik. Biz buna inanȇrız, biz bunu çekederiz yapmaa. Sanȇrız, ani halk bunu işidecek, görecek da bizimnän bilä çalışacȇk».
Delegatlar syezdın süresindä ayırıldı partiya öndercileri. Onun başınnan oldu Nikolay Dudoglo, ama başın yardımcısınnan İvan Kılçik.
