Komratta Bakannık komiteti hem Halk topluşu yapısının önündä, açık gök altında sergi açıldı. Burada İkinci dünnä cengindä pay alannarın patretleri var hem onnar için kısa bilgilär. Hepsi bu onnar — gagauzlar. Onnarın da usluluk için güreşmesindä büük katkıları var.
«Enseyiş üzleri» sergisindä cenk edän gagauzların patretlri hem onnar için kısa bilgilär var. Bu insannar saalıklarını hem cannarını kurban ettilär, ki gelecek zamannarda, evlad boyları uslulukta hem raatlıkta yaşasınnar. Onnar, kimin soy-senseleri cenk ettilär, var nicä onnarın patretlerini bu sergiya getirsinnär. Butakım bu kahramannar için dä cümnä bilecek. Askerlerin birisi — Anton Buyuklı. Biz hepsi bu insannarı aklımızda tutalım lääzım — söledi Gagauz Eri Bakannık komiteti başı ilk yardımcısı İlya Uzun: «Anton Buyuklı kendisini düşünmedi. O kurban oldu. Bu üzerä bizim borcumuz — bilmää bu insannar için, aklımızda onnarı tutmaa».
Sergiyi Bakannık komiteti Bilim-Aaraştırmak merkezinnän birliktä kurdu, söledi Dış işleri bakanı Anastasiya Çolak: «Burada benim dädumun bobasının da patredi var. O cenktän evä döndü. Ama yaralanmakların beterinä geçindi».
Gagauz Eri Bilim-Aaraştırmak merkezi başı işini götürän İ.Konstantinova şükür etti bilimcileri, ani İkinci dünnä cengindä pay alan gagauzlar için bilgileri toplȇȇrlar.
«Biz lüzım tutalım bu insnnarı aklımızda sade ozaman onnar diveç kalaceklar»,- İrina Konstantinova söledi.
«Enseyiş üzleri» sergisinä Üüretim kurumnarın üürenicileri dä geldilär.
«Biz bu kahramannar için bilelim lääzım hem dä akıllarımızda onnarı tutalım. Çünkü onnarın hatırınnan buncak yıl başımızın üstündä açık gök var»,- Üliya Sandu nışannadı.
«Enseyiş üzleri» sergisi mayın onunadan açık olacȇk. Herbir isteyän var nasıl gelsin dä burada olan kahramannarın istoriyalarınnan tanışsın.
Moldovanın hem Gagauziyanın en mekalı haberleri GRTnın Telegram kanalında!