Kazayak küüyün liţeyindä diiştirdilär eri hem geçirdilär eni elektrikayı. Şindi sport dersleri geçerlär taa uygun hem korkunçuz koşullarda.
Çok yıllar Kazayak küüyün liţeyi sport zalasında derindän düzdürtmäk işleri yapılmadılar. Er burada artık pek prost durumda bulunardı, elektrika da eskimişti. Burada şindi enidän eri yaptılar, elektrikayı diiştirdilär hem eni şafk avadannıklarını koydular. Üürenicilär notaladılar yapılan işleri.
«Biz pek sevineriz hepsimiz, ani bizä yaptılar çok gözäl zalı, ani biz var nicä burada oynayalım, gülelim, yapalım burada hepsini, ne lääzım yapsınnar uşaklar sport uurunda».
«Saa olsunnar, ani yaptılar bizä bölä zalı, biz pek beendik».
«Biz pek sevineriz, ani yapıldı eni zal, pek islää burada geçirmää dersleri da saa ol hepsinä,ani yaptınız bölä zal».
Sport dersindä üüredici Födor Üsümbeli liţeydä çalışêr 46 yıldan zeedä. Onun laflarına görä, her yıl kosmetika işleri yapılardılar, ama bölä derindän diişmeklär yapılmadılar. O şükür etti hepsini, kim yardımcı oldu sport zalanın düzülmesindä.
«Yaptılar o proekti gözäl pek, uşaklara , onnar sevinerlär, gelerlär büük açık üreklän, gelerlär, zanaatlanêrlar, üşümerlär. Bän sevinerim buna, çok saa olsun administraţiya hem deputat, onun da yardımı var»,- üüredici nışannadı.
Liţeyin direktoru Diana Fazlı haberledi, ani remont işlerini yapmaa deyni paralar verildilär bücettän. O nışannadı,ani bu proyekt pek önemni liţey için.
«Çok yıl olmadı bizim zalada remont, er eskiydi, lääzımdı diiştirmää. Bücettän verdilär para,ani bu proekti yapalım. Biz enilettik hem eri, hem diiştirdik elektrikayı. Saa olsun, kim yardım etti bizä bu proekti yapmaa»,- Diana Fazlı haberledi.
Sport üüredicisi Aleksandr Barban nışannadı,ani geçirmää şindi dersleri enilenmiş zalada taa uygun.
«Er oldu taa uz, taa kırnak, taa gözäl, uşaklara taa kolay oynamaa. Diişti, açıldı zal, oldu taa aydanık, diiştirdilär şafkları, erleri, burada sıcak, uşaklara kolay zanatlanmaa, pek islää burada şindi», — Aleksandr Barban nışannadı.
Kazayak liţeyindä bu düzdürtmäk işlerini geçirmää bücettän verildi 400 bin ley. Şindi hazırlanêr proekt hem dokumentlär, ki diiştirmää sport zalasında pençereleri hem eniletmää duvarları.
Moldovanın hem Gagauziyanın en mekalı haberleri GRTnın Telegram kanalında!