Eni Yıl yortuları gözäl bir atmosferaylan Beşalma küüyündä başladı. Eni Yıl çam aacı bu yıl Gagauziya Başkanı Guţul Evgeniya yardımınnan koyuldu.
Gagauziya Başkanın Guţul Evgeniyanın iniţiativasına görä Beşalma küüyün merkezindä çam aacı koyuldu. Küü başı Valeriy Moş nışannadı, ani yortuyu yaşayannar pek bekledilär.
«Bu yıl bizä yardım etti Gagauziya Başkanı, onun komandası. Onnar bizä bu gözäl yolkayı koydular, angısı sevindirecek Beşalmanın yaşayannarını.Pek sevindik, ani o ötää dooru da kalacek bizdä, biz her yıl yakışacek koyalım onu da sevindirelim insannarı , gösterelim onnara, ani onnar yalnız diil, var annaşmak hem sevinmelik»,- Valeriy Moş nışannadı.
«Eni Yıla karşı herzaman gözäl işlär olȇrlar. Bu gözäl işlerin birisini bizä Gagauziya öndercilii baaşladı. Şükür etmää onu isteerim. Bizim analar görerlär, nıcä bizim uşaklarımız bu yortuya sevinerlär. Büülü personajları da şükür ederiz bu gözäl yortu için»,- GHT deputatı nışannadı.
Gözäl donadılı çam aacın dolayında toplandılar ana-bobalar, uşaklar. Yortulu atmosferayı kurdular animatorlar hem yortunun en önemni personajları Ayaz Dädusu hem Kaarcaska.
«Bu yortuyu bekleer küçüü dä, büüyü dä, çünkü o olȇr yılda bir sıra, o getirer çok sürprizlär-ondan uşaklar da hoşluk kablederlär , büüklär dä sevinerlär bu yortuya. Biz Kultura evin uzmannarı olarak , kendimiz da bekleeriz bu yortuyu»,- Georgiy Kösä söledi.
Yaşayannar küüyün merkezindä bir erä toplanıp, Eni Yıl yortuların açılışında pay almaya pek sevindilär.
«İsteerim kutlamaa Beşalmanın hem Gagauziyanın hepsi yaşayannarını bu yortuylan».
«Gözäl başaralım eski yılı hem olsun uslukuk. En önemni usluluk hem saalık».
«Pek gözäl çam aacı. Altın hem kırmızı toplarlan donadılı».
«Başkanı bu dikkatlık için hem bizä gösterilän destek için şükür ederim».
«Uşaklarlan burayı geldik. Bu yıl usluluk bekleeriz, ki bizim uşacıklarımız raatlıkta yaşasınnar».
Başlayarak dekabr ayından kolada yortularınadan Beşalma küüyü çam aacın dolayında türlü yortulu olaylar geçirileceklär.
