Moldovada şoferlara deyni eni kurallar kabledildi. Artık arabanın saabisi, polițiyanın kararına görä, lääzım olacȇk geçsin anti-narkotik testını. Bu kurallar yardım edeceklär yol gezmesi korkunçsuz olsun hem yol razgelmelerin sayısı, angıları narkotiklerin beterinä oldu, iisilsin.
Eni kurallara görä, eer polițiya esap alarsa, ani şoför şüpeli yada kötü maşinayı götürer, ona test narkotiklerä o saat erindä yapılacȇk.
«Kanon diişikliklerin en önemni neeti — ilerletmää polițiyanın kolaylıklarını güreşmää narkotiklärlän hem psihotrop işlärlän, hem onnarın kullanmasınnan, korumaa insannarı onnardan, hem onnarın zararından, esaba almaa yol kurallarını, yapmaa öla, ki yol gezmesi korkuçsuz olsun, güreşmää kanona karşı yaptıklarlan, angılar narkotiklerin beterinä oldu hem kaaviletmää güvennii insannarın arasında», — sölener proektin bilgi notasında.
Eer şoför kayıl olmarsa testın çıkışlarınnan, polițiya getirecek onu bolnițaya, neredä alınacȇk eni probalar test yapmak için. Şoför istämärsä gitmää saalık kurumuna bu nışannayacȇk, ani o kayıl olmuş testın çıkışınnan.
«İnsanın vazgeçmesi gelmää saalık kurumuna almaa biolojik probalarını nışannayacȇk şoferin kayıllıını narkotik testın sonucunnan, belli edecek, ani o kayıl oldu testlan»,- nışannanȇr proekttä.
Şoförlar hem yayan gezän insannar düşünerlar, ani butakım eniliklerin var eri, çünkü onnar yardımcı olacȇk, da yolda kötü durumu diişecek.
«Düşünerim, ani içkilärlän hem narkotiklärlän bunu dooru yapȇrlar. Şoför onnarı kullanarsa, lääzım cezalamaa. Onnarı kulanarkan, başka insannara zarar yapıler».
«Eer polițiyaya neysä şüpeli görünürsä, ko kontrol etsinnär şoförları, nedän bunu yapmamaa. Onnar birinin yaşamasına karışmȇrlar, bu sadece trafik kurallar için. İçkileri, narkotikleri maşınada kullanmaa diil laazım».
«Narkotiklär şaraptan taa da beter, onnarın kullanmasını kimär kerä esaba alamersın.Şoförların ellerindä başka insannarın yaşaması hem, eer şoför dikkat olmarsaydı, kurallara karşı gidärsä, o kanona karşı gider».
«Bu dooru.Eer sän bişey içmedin, bişey kullamnadın, yok nedän korkmaa».
«Bu ii, çünkü narkotiklär yoksa, yollarda taa korkunçsuz olacȇk».
«Lääzım güreşmää narkotıklärlän hem içkiylän, çünkü avariya hem ölüm çok var».
«Düşünerim, ani bu lääzım. Çok kişi sentetik narkotikleri kullanȇr. Gençlär taa ii sportlan zanaatlasınnar, ama diil narkotiklärlän».
«Lääzım, çünkü çok avariyalar var. Narkotiklär için bizä dä, yayan gezän insannara da, zarar var».
Kuvetlär nışannȇȇrlar, ki butakım karar o taa bir adım nartkotiklärlän hem onnarın kullanmasınnan güreşmäk yolunda.
