Komradın 7-ci uşak başçasında ana-boba toplantısı geçti, neredä yaslanın çalışannarı, primarın yardımcısı, muniţipal nasaatçıları, analar-bobalar, eni imäk sistemasını geliştirän kompaniyanın öndercisi pay aldılar.
7-ci uşak başçasının ana-boba toplantısının sırasında baş temaydı – kasabanın yaslalarında eni imäk sistemasının geliştirilmesi. Proektä görä, uşaklara imekleri ȇkonomika agenti yapacek. «Süüt aacı» uşak başçasının öndercisi Alla Verbina proektin ii hem bet taraflarını belli etti: «Plüs onda, ani yaslanın medik işçisindä hem zavhozda taa çok vakıt boşalacek. Çünkü menüyu yazȇr, koloriyaları sayȇr hem sertifikatlar için cuvap eder medik işçisi. Bu izmetleri üstünä kompaniya alȇr. Мinuslar –kompaniya gelincä aşçılara taa çok iş gelecek hem taa çok vakıt lääzım. Bizdä bir aşçı 6-14 kadar işleer, ikincisi — 8-16-dän. Deyecez hamurdan imeyi lääzım olarsa hazırlamaa, aşçı taa çok oyalanacek iştä, aylık parası sa hep o kalacek. Kompaniya gelärsä, bän aşçıları lääzım iştän çıkarım da geçsinnär o firmaya, çünkü onnar kufnemizi kiraya alȇrlar».
Коmpaniya üstünä alȇr uşakları doyurmaa, angısı sorumnu normalara yaklaşȇr, onnar da kontrol edilerlär saalıı korumak ministerliinnän.
«Var maasuz normalar. Hazırlanmış imek çeşitlerini Sanȇpidemstanţıyasına yollandırȇrız. Onnar kontrol ederlär normaları. İmek çeşitleri başkalanȇrlar»,- Doyna Kuzor, autsorsing kompaniyası başı, nışannadı.
Buluşmanın pay alannarı: analar-bobalar, nasaatçılar, primariya temsilcileri eni diişilmeklerä kendi bakışlarını açıkladılar.
«Yarım yıldan sora uşak başçaları kendibaşına finanslamasına geçeceklär, nedän alatlȇȇrsınız bu diişmekleri çalıştırmaa?»,- sordu bobaların biri.
«İmeyi uşak başçasında eni uura çıkarmaa. Kurtarılmış paralara primariya yaslaya deyni başka proektleri geliştirecek. Er analar-bobalar 100% kayıl olarsalar, biz annaşmayı imzalayacez, o da yarım yıla. Kayıl olmarsanız- imzalamayacez annaşmayı»,- Komradın primar yardımcısı Stepan Kara cuvap etti.
«Tenderı primariya bildirdi denemäk için hem tenderda pay aldı sade bu kompaniya»,- muniţipal nasaatçısı İvan Panä kendi bakışını açıkladı.
«Siz neredän menü alȇrsınız?»,- sordu Maksim Bolgar, muniţıpal nasaatçısı, boba.
«Bizim komandaya tehnolog girer hem iki medik yardımcısı, te onnar da 638-ci kanonuna görä yapılı. Önemni normaları kullanmaa. Ama firma imekleri kendibaşına diiştiräbilir»,- Doyna Kuzor
Muniţipal nasaatın başı Georgiy Vlah urguladı, ani nasaatçılar hepsi uşak başçalarında bulunaceklar da blankları brakaceklar, neredä analar-bobalar kendi bakışlarını, kayıl mı geçmää eni imäk sistemasına osa diil mi kayıl, lääzım belli etsinnär.
«Analar-bobalar herbir uşak başçasında seslerinnän belli edeceklär isteerlär mi autsorsing yapılsın, osa istämeerlär mi. Biz da kendi tarafımızdan topluşta tutturacez sizi»,- Komrat muniţipal nasaatın başı Georgiy Vlah çizgiledi.
Eni sistemasının geliştirilmesi primariyanın temsilcilerin bakışına görä taa kaliteli hem ȇkonomiyalı olacek.
