2024 yılda en ii çıkışlara etişmiş sportçuları hem trenerleri ödülledilär Komratta. Olayın pay alannarı urgladılar,ani geçmiş yıl sport uurunda bereketliydi.
Geçmiş yılın çıkışlarına görä regionun sportçuları 218 medali kazandılar nicä devlet ölä da dünnä uurlarında, sport uurunda yıl başarılı oldu, urguladı Gençlik hem sport bakanı Väçeslav Dragoy. O nışannadı,ani sportçuların çalışması hem trenerlerin ii terbi etmesi bölä uura getirdi.
«Kazanıldı 218 medali respublika hem devlet arası uurunda, bu sayıda 77 altın, 49 gümüş hem 92 bronza medalileri.Moldova uurunda kazanıldı 68 altın, 44 gümüş hem 2 bronza medali»,- sport bakanı nışannadı.
Bakannık komiteti başı ilk yardımcısı İlya Uzun nışannadı,ani sportçu olmaa –çok zor bir iş, neçinki lääzım büük istemäk, kuvet etişmää deyni koyulmuş neetlerä.
«Olmaa sportçu- o diil sade sportlan sabaalendän avşama kadar zanaatlanmaa. Sizä bakȇr gençlär. Siz — Gagauz avtonomiyanın hodullanması.Bakannık komiteti ne kuvedi brakȇr yapȇrlar,bakmayarak ona ani büdjet etişmeer. Geçmiş yıla öncä kararlandı 6.5 mln. ley, geçän hem bu yılda sa 4 mln. Ley»,- İlya Uzun nışannadı.
GHT spiker yardımcısı Nikolay Ormanjı urguladı,ani sportçular halklararası uurunda dünnedä avtonomiyayı bildirerlär. O taa umut eder,ani yakın zamannarda deputatlar kablederceklär sport için maasuz kanonu,angısında belli olaceklar hepsi premiyalar hem sport çeşitleri,ne illinnedecek işi bu uurda.
«İsteerim dilemää sizä kaavi saalık, ii başarları, brakılmamaa taramaklarda, koymaa üüsek neetleri hem etişmää onnara»,- Nikolay Ormanjı urguladı.
Regional sport liţeyi başı Harlampiy Hor nışannadı,ani sportçuların hem trenerlerin üüsek çalışması kaavileştirer Gagauziyanın avtoritetini dünnä meydanında.
«Gagauziyanın hem Moldovanın bayrakları yıl yıldan taa sık piedestala kaldırılȇrlar.Umutlanȇrım sportçuların girginniinä hem trenerlerin dayanmasına. Gösterin örnek hepsinä, kim düş güder hem isteer sporta gelmää»,- Harlampiy Hor nışannadı.
Fizik kulturasında hem sport uurundaä şannı ödülü kablettilär regional sport liţeyi başı Harlampiy Hor, serbest güreşmesi trener Födor Tukan, Boks treneri İlya Çernioglo, Çadır kasabası sport okulu metodisti Ȇduard Kınçev. Pay alannarın çoyuna ödülleri ii başarlar için verdilär. Pay alannarı nışannadılar, ani kuvetlerin,trenerlerin hem sportçuların barabar çalışması ilerletmää sportu regionda kolaylıı verecek hem destekleycek eni üüsek uurlara etişmää.
Moldovanın hem Gagauziyanın en mekalı haberleri GRTnın Telegram kanalında!