Çadır kasabasında 2024-cü yılın futbol başarların çıkışlarını belli ettilär. Olayı hazırladı Futbol asoţiaţiyası. Burada nışannadılar en ii oyuncuları, hep ölä dä ödülleri kablettilär o kişilär,kim çok kuvet koyêr futbolun ilerlemesinä.
Genç sportçular «Çadır» futbol okulundan üüsek uurda gösterdilär kasabayı hem devleti erli hem halklararası yarışmalarda. Onnar kazandılar ilk erleri hem profesional sportçuların dikkatlıını kablettilär. En ii oyuncular ödülleri kazandılar.
«Benim adım Stoyanov Aleksandr. Bän futbola gezerim 5 yıl. Benim batüm çekettti bu sportlan zanaatlanmaa,sora da bän. Pek severim futbolu.Büün kablettim en ii koruyucu ödülünü, pek sevindim. Çok baaşış kablettim».
«Bän iki yıl futbola gezerim. Ayırdım bu sportu, neçinki pek severim onu. Oldum en ii bombardir iki keret, aldım ilk erleri».
«Benim adım Dremuçkin Oleg. 4 yıl futbollan zanaatlanêrım. Pek beenerim futbolu. Taa küçüktän bobamnan gidärdim stadiona, da biz oynaardık».
Genç futbolcuları kutladı Moldova Vengriya devleti büük elçisi. O kendisi da futbolu pek sever hem çok yıl zanaatlanmış bu sportlan. O verdi baaşış okula — eni futbol giimnerini.
«Pek sevinerim burada görmää çok uşak, pek memnunum, ani onnar zanaatlanêrlar futbollan, nicä da bän ilerdän. Isteerim sölemää, ani kaavi güüdä- kaavi saalık hem fikir. Uşaklar futbol oynayarkan dost olêrlar diil sade oyunda, ama sora da. Onnar üürenerlär konkurent olmaa hem yarışmaa biri birinnän»,- Vengriya devleti Büük elçisi Moldovada Şandor Sab nışannadı.
Regionda ilerleerlär türlü sport zanaatları. Ama futbol taa hızlı. Bu önemli bizim uşaklarımız için, nışannadı Gagauziya sport bakannın sport ilerlemesi bölümü başı Pötr Kuru.
«Bitkiy 8-10 yılın içindä açıldı 6 okul. bölä yoktur olduu. Bän açan geldim işlemää — vardı sade 4 okul Gagauziyada. Şindi sa13 şkola, pek islää ani açılêrlar bu uurda sportta, bizim sportçular sanêrım, ani ileri doru da göstereceklär gözäl işin sırasını»,- nışannadı Kuru.
«Çadır» futbol okulu başı Ivan Genov nışannadı, ani bu yıl pek gözäl hem başarılı oldu futbolcular için. O şükür etti hepsini, kim yardım eder futbol ilerlesin.
«Şükür ederim hepsini,kim yardım eder futbol sportuna. Unutmayacam bir keret tä, ani futboldan taa islää yok. Futbol en ii ilaç. Kim hasta futbollan — o her zaman kaavi hem saalıklı. Sayêrım,ani ilerdä bizim planlar geniş. Sanêrım,ani üüsek uurda hep gösterecez Moldovayı halklararası turnirlerdä»,- dedi Genov.
Çadır futbol okulunda zanaatlanêr 150 uşak.
Avtor: A. Karapirä, operator hem montaj: L. Arfonos