Büük ayın 27 — dä Komrat kasabasının Kultura evindä açıldı «Düş Gütmäk Kanatları» personal sergisi. Onda Kişinöv kasabasının genç resimciykanın Mariya Radeţkinin resimneri gösterili.
Resimciyka Mariya Radeţkaya çeketti yazmaa resimneri, açan 10 yaşındaydı. Gagauziya Baş kasabasına Komrada o getirdi 20 kendi işini. Mariya 20 yaşında, o büük hodulluklan pay oldu bizimnän, kimä adadı kendi ilk yaratma işini.
«İlk benim işim «Papatya». Bu senin ilk serginin? Komratta ilk. Kim yardımcı olȇr sana? Anam. Ne istersin adama serginin katılannarına?Usluluk dünnedä hem dä iilik»,- annattı resimciyka.
Genç resimciykanın anası Alla Radeţkiy haberledi, ani taa Mariyanın küçüklüündän esap aldı, ani onda var büük talant incä zanaatta. Ama onu bireri da almazdılar derslerä. Da te bir sıra şaşılacek iş oldu, Mariyayı esaba aldı Alöna Petrovna Lazareva.
«Biz tanıştık bir pek käämil insannan, resimciykaylan, da o çeketti Mariyaylan zanaatlanmaa. Bän dä onunnan gezdim, sevdim bän dä, da 10 yaşında çeketti ölä uurda resimcilik, angısını annardılar başkaları da. Bu tek insan. Bän çok şükür ederim ona. O Bender kasabasında, resim galereyasında çalışardı uşaklarlan, da söledi gelin, biz hepsini kabederiz»,- kızın anası nışannadı.
Kolaylıksız uşaklar hem gençlär için STOİCCİ cümnä kurumun administratoru Olesä Topal çalışȇr bölä insannarlan şindän sora 20 yıl. Söleer, ani kurumun neeti-ilerletmää uşakların hem gençlerin ii taraflarını, kurmaa onnar için lääzımnı koşulları.
«Pek sevinerim, ani zamandaşta var bölä kolaylıklar, bölä koşullar, ki Gagauziyanın yaşayannarında 3 aftanın süresindä olsun kolaylıkları gelsinnär da siiretsinnär bu vakıdın içindä Mariya Radeţkinin yartama işlerini. Burada 20 resim. Var, angılarını şindän sora satın aldılar. Pek umutlanȇrım, ani bu sergiyi pek seveceklär Gagauziyanın yaşayannarı hem misaafirleri»,- çizgiledi Olesä.
Kişinöv kasabasının genç resimciykanın Mariya Radeţkinin «Düş Gütmäk Kanatları» personal sergisinin açılışı oldu Komrat kasabasının primariyanın, kolaylıksız uşaklar hem gençlär için STOİCCİ cümnä kurumun hem Komrat kasabasının Kultura evin tutturmalarınnan. Gagauziya Baş kasabasının primarı Sergey Anastasov çizgiledi, ani sergi pek önemni avtonomiyada giriştirmää deyni kulturayı.
«Onda pek büük kolaylıklar. Biz göreriz käämil resimneri, nereyi girerlär bölä işlär, nicä kafȇnın açılması, neredä geçecek onun resimnerin prezentaţiyası.Nesoy sa imäk malları, angılarını o en pek sever. O bunnarı isteer uşaklara vermää, hem elbetki zanaatlanma bununnan.Pek aktiv bir uşak»,- çizgiledi Komradın primarı.
Komrat kasabasının kultura evin başı Marina Manjul çizgiledi, ani yılın süresindä geçerlär türlü foto hem resim sergileri, ama bölä ȇkspoziţiya taa olmadı.
«Resimciyka koyȇr resimnerä diil sade, ne görer dünnedä, ama koyȇr canını da, da hepsi bunnar belli onun resimnerindä»,- sayȇr Kultura evin başı.
Komrat kasabasının primarın yardımcısı Stepan Kara çizgiledi, ani primariya her zaman tutturardı uşakları hem gençleri , hep ölä ileri dooru da yardımcı olacek açmaa onnarın talantlarını.
«Zamandaşta onnar da lääzım ilerlesinnär, lääzım kabletsinnär islä duyguları kendi sevän işlerindän, hem da insannarlan pay olsunnar bu sevinmeliklärlän. Geldim, kaldırdım kefimi bu kämil resimnerdän. Satın aldım ikisini»,- nışannadı Stepan Kara.
Kişinöv kasabasının genç resimciykanın Mariya Radeţkinin «Düş Gütmäk Kanatları» personal sergisi uzanacek Komrat kasabasının kultura evindä küçük ayın 14 — dän.
