Aprelin 7-dä Dünnä saalık günü bakılȇr.
Bu yıl Dünnä saalık günün baş neeti metiţina izmetinin kalitesi için informaţiyayı açıklamaa. Göstermää, ani keliteli mediţina izmeti insana saalıklı yaşamayı verer. Herbir insanın var hakı dooru hem üüsek uurda ilaçlanmayı kabletmää, bakmayarak ona,neredä o yaşȇȇr, netürlü onun soţial statusu, yaşlı mı o osaydı genç mi. Bunun için aylä doktoru Lübov Bargan söledi: «Saalıklı insanın hem güüdesi saa, hem dä psihikası. O raat. Onun birersi acımȇȇr. Ama bu terminä sadece mediţina tarafından bakmaa olmaz. İnsannar soţial hem moral taraflarından da başarılı olsunnar lääzım. Bu insannar için var nasıl demää, ani onnarın kaavi saalıkları var. Onnar kısmetli dä. Bölä da deyelim var nasıl».
Dünnä saalık günü sınırlarında Gagauziyanın üüretmäk kurumnarında hem saalık merkezlerindä informaţiya kampaniyaları, treningläar, sport olayları geçirilerlär. Gençlerä annadȇrlar, nesoy onnar saalıklarını korusunnar var nasıl.
«Bitki vakıtlar paţientlerimizin haberleri bu uurda üüseler. Onnarın var haberleri. Ama biz bu uurda işimizi ilerlederiz. İsteeriz, ki taa çok kişi saalıklı yaşamayı seçsin. Sportlan zanaatlansın, güüdesini zihirleyän imekleri imesin»,- Lübov Bargan söledi.
Mediklär çizgileerlär, ani herbir insan kendi saalıını korusun lääzım. Bireri acımaa başladıynan, mutlak doktorlara danışın. Bundan kaarä vakıdında analizleri vermää lääzım, saalık halını göz altında tutmaa deyni. Sportlan zanaatlanmaa, içki hem tütün içmemää. Bu kurallar uzun ömürü ayakta hem saalıkta yaşamaa yardım edeceklär.
Moldovanın hem Gagauziyanın en mekalı haberleriGRTnın Telegram kanalında!