Horvatiyada, Zegber kasabasında, serbest güreşi uurunda veterannarın arasında dünnä çempionatı geçti. Bu turnira katıldı Gagauz Erin sportçusu Dmitriy Malenkov. O 70 kila aarlık kategoriyasında çempion titulunu taradı.
Serbest güreşi Dünnä çempionatında pay alan Gagauz Erindän sportçuyu Malenkov Dmitriyi onun trenerı İlya Uzun tutturdu. İlya Uzun urguladı, ani büük havezlän bu önemni momentlerdä Malenkov Dmitriyin yanında bulundu.
«Bütün ürektän kutlȇȇrım Dmitriyi çempion titulunnan. Ona saalık dileerim. Üüsek uurlara çıksın. Dima, hepsinä gösterdin, ani haliz çempionsun. Büük bir iş yaptın. Alla sana yardımcı oldu, o seni butakım şükür etti»,- dedi trener İlya Uzun.
Dmitriy Malenkov kendi duygularınnan paylaştı. O annattı, ani havezlän bu çempionata katıldı. Dmitriy umutlanȇr, ani ötää dooru da olacȇk kolayı türlü yarışmalara katılmaa hem ensemää.
«Moldovanın komandasını temsil ettim. 70 kila arlık kategoriyasında güreştim. Çempion titulunu taradım. Hepsi kiminnän güreştim — kaavi sportçulardılar. Ama bana uydu. Bän ensedim. Dileerim, ki ileri dooru hepsinä uysun»,- nışannadı çempion Dmitriy .
Dmitriy Malenkov — sport uurunda master. O türlü yarışmalarda Moldovayı başarılı temsil etti. ilk erleri kazandı. O inandırdı hepsini, ani veterannar da türlü uurlarda ilk erleri alabilerlär.
Avtor: V.Çoban, montaj: A.Topal