Gagauziyada koronavirus sayıya konulmadı. Bu iş için zanaatçılar sölerlär.
Moldova devletin cümnä saalık milli agenstvosu haberler, ani 2025-ci yılın yanvar ayın 13-dän 19-na kadar suuklamak hastalıkların sayısı bütünnä Moldovada aaşaakı uurda bulunȇr. Ama bakarak bir aftaya geeri da yaraştırarak büünkü zamana- o 20 proţendä üüseldi. Gagauziyanın üç dolayında da benzär durum. Nicä haberledi Çadır bolniţanın başı Natalya Popazoglo: «Büünkü gün bizdä 53 uşak buluner da bitki iki ayın içindä durum diişilmeer. Bolniţada buluner taa çok uşak, angıları ambulator ilaçlamayı kablettilär, ama onnara o yardım etmedi. Terapiya bölümündä 48 paţient. Oktäbir ayından koronavirus hastalıı sayıya konulmadı».
Natalya Popazoglo nışannadı, ani medik kurumunda lääzımnı ilaçlar eterli sayıda var. Yılın çeketmesindä hepsi tenderlar vakıtçasına geçirildilär da problema ilaçlarlan yok. Komrat bolniţanın doktoru Evgeniya Bratunova annattı durum için: «Bu yılın zamanı için durum herzamankı gibi. Hastaların sayısı 25-30 kişi. Her gün bolniţaya düşer 3-5 hasta. Bölüm dolu ama er taa var. Belli ediler A hem B grip hastalıı hem rotovirus. Bitki birbuçuk ayın içindä koronavirus belli olmadı. İlaçlarlan problema yok».
Valkaneş saalık merkezin doktoru Georgiy Geţoy nışannadı: «Dolayda bu yılın çeketmesindän 21 suuklamak olayı belli oldu. Şindiki vakıt bolniţada 13 büük hem 5 uşak bulunȇr. Bakarak 2024-cü yılın hep bu vakıdına durum taa islää».
Medik uzmannarı vererlär nasaat ki yaşayannar gigiena tertiplerini hem kurallarını kullansınnar hem da taa aaz bulunsunnar o erlerdä neredä çok insan toplanȇr.
